Jerusalem, ïaïong:
Ki heh nongialam ba don bor jong ka pyrthei, ha kane ka por ki la pynpaw ia ka jingsngew syier bad jing sheptieng ioh ka jingleit kput jong ka Iran ia ka Israel ka lah ban wanrah ia ka thma bah kaba jur hapoh Middle East baroh kawei. Kane ka long ruh hadien ba ka Israel ka la pynbor ia ki tnat bapher bapher jong ka pyrthei ban pynkut noh ia ka jingiadei kam bad ka Iran bad ban pynsah marwei ia ka Iran kumba ki la leh ia ka Russia namar ka jing-leit hiar thma pyrshah ia ka Ukraine ha kine ki snem ba la leit.
La ong ba ka Iran ha kine ar sngi mynta ka la ther kylla ia ka Israel da ka jingbitar namar ka jingleit thombor jong ka Israel ia ka tnat ba dei khmih jong ka Iran hapoh Syria ha ki khyndiat por ba la leit jong une hi u bnai.
Kumta, katei ka jing-leit pynhiar kput jong ka Iran ka la wanrah jingsyier ia ka Middle East baroh kawei hadien hynriew bnai ka jingiakhun thma ba khlem sangeh hapdeng ka Israel bad ki lehnoh Hamas bad katno lei kan nang kham shyrkhei lada ka Israel ka hap ban iakhun ia ki Hamas bad ka Iran ha kajuh ka por. Nalor kata, ka Hamas ka don ia ki nongkyrshan kiba dei ki lehnoh Hezbollah jong ka Lebanon, bad kane kan ktah jur ia ka Israel ha kaba baroh ki ri ka Middle East kin hap ban iasnoh kti lang bad ban iarap paralok bad ynda kata ka por kan por, ka thma bah kam slem shuh ban jia.
Namarkata, kitei ki heh nongialam jong ka pyrthei bad jong ki tnat bapher kiba don ia ka bor ban synshar bad pyniaid ia ka jinglong- jingman ha ka pyrthei, ki la maham tyngeh ba katei ka jingïakynad hapdeng ka Iran bad ka Israel ha kane ka por ka lah ban wanrah ia ka thma ha baroh kawei ka pyrthei syndon bad kane kan long ka Thma-bah ba Lai lane ka ‘Third World War’ kumba ju iatip paidbah.
Namar la ong ba u nongrah ktien ka Israel sha ka UN, u Gilad Erdan, u la dawa ia ka UN ba kan pynngat kyndon bad kan pynsah marwei noh ia ka Iran namar kitei ki jingleit pynhiar kput bad jingleh dusmon jongka pyrshah ia ka Israel ha kane ka sien bad ba ka Israel kam lah shuh ban map.
wat la katta, ki heh ka kynhun G7 ki la pynpaw ba ki dang pynkhreh ban wanrah ia ka lad jingiasuk bad ban tehlakam ia ki jingiakynad ha kitei ki ri ka Middle East katba ki don ka buit bad ka bor ban pynsngewthuh bad pyn jai-jai ia kitei ki ri kiba don mynta hapdeng ka jingiakynad.
