Shillong, Ïaïong 16
U President ka Voice of the People Party (VPP), Bah Ardent M. Basaïawmoit u la ong ba ka National People’s Party (NPP) kam don ïa ka mang treikam ne ‘Manifesto’ bad kumta ka lah ban pyntreikam da ka ‘Manifesto’ jong ka Bharatiya Janata Party (BJP) ha kane ka ilekshon ban wan sha ka Lok Sabha.
Haba buh jingkylli halor ki nongrim jong kiwei-kiwei ki seng saiñ pyrthei ha kane ka ilekshon, u Bah Basaïawmoit haba ai jingkren ha Mawkhar ha ka janmiet Sngi Ba-ar u la ong, “Haba ki leit jingïalang, tang u nongsngap ruh bun bym don, nalor kata ki la pynbiang lut nadong-shadong bad naduh sdang haduh kut, shu ther tang ïa u Ardent, ïa ka VPP bad ïa u ‘Prah’.”
Ha kajuh ka por, haba kdew ba kim don da kawei pat ka mat ban kren, u nongïalam ka VPP u la ong, “Ka NPP lei kan don mat aïu haba tang ïa ka ‘Manifesto’ ruh haduh mynta kim pat pynmih. Imat kin pyntreikam da ka ‘Manifesto’ jong ka BJP.”
Haba ban biang ba ka NPP kam don kano-kano ka mat ha kane ka ilekshon ban wan, u la ong ba namar ka jingkyrshan ka BJP, ka NPP kan shu mynjur beit ïa ki mat jingkular jong ka (BJP).
Halor ka jingbeiñ jingkhoh ïa ki paidbah kiba wan sha ki jingïalang jong ka VPP ba ki dei kiba shitkhlieh bad kiba leh shongshit, u President u la ong, “Ko Symbud Myntri Rangbah badonburom, ki paidbah kiba wan sha ka jingïalang jong ka VPP ki khlem wan ban leh shongshit namar kiba shongshit bunsien, dei kiba ïoh kyiad ei, ba ïoh pisa ei, kiba ïoh bam ei. U paidbah uba wan sha ka jingïalang jong ka VPP um dei u paidbah uba shongshit hynrei u paidbah uba shit rhem.”
U la ong ruh ba u paidbah u shit rhem namar ka jingkmen kaba shlei bad mih na ka dohnud jong ka jaidbynriew naba ki ïohi biang sa shisien ïa ka jingkyrmen lyngba ka VPP.
Kumjuh, haba ïadei bad ka jingshah buh jingkylli jong u halor ka ‘Clean Politics’, u Bah Basaïawmoit u la ong ba ka VPP ka dei ka bynta ba kongsan tam jong ka ‘People’s Movement’, ‘Political Movement’, jong ka saiñ pyrthei kaba khuid ba suba bad mynta ka poi ha kane ka kynti ban wanrah jingkylla ha kane ka ri.
Shuh shuh u la bynrap ba hadien ba la seng ïa ka VPP, ka jaidbynriew ka la dep ban ïakhun ïa kawei ka ‘test’ – ka ilekshon ha u snem 2023 ha kaba ka la jop ha 4 tylli ki konstitwensi, katba ka ‘test’ ka ba-ar ka dei ka ilekshon MP bad ka khmih lynti ban jop ha baroh 36 tylli ki konstitwensi.
