Tura, Ïaïong 16
Kawei ka jingkieng kaba don ha ka thaiñ Bagla, Dimapara ha rilum Garo ka la hap jraiñ ha ka step jong ka Sngi Ba-ar ha ka por ba dang ïaid ar tylli ki trok kit shini.
Kane ka jingkieng ka dei kawei na ki jingkieng kaba kongsan eh ha rilum Garo naba ka dei kaba pynïasoh ïa ka West Garo Hills bad ka South Garo Hills. La ong kane ka jingkieng nar bajrong 60 meter kaba don ha ka surokbah NH-217, ka dei kaba ju pyndonkam da kiba bun ban leit sha Baghmara ha South Garo Hills.
Wat la katta, ka la don ka jingkhang ban ïaid ki kali heh ha kane ka jingkieng, hynrei la ong ba ar tylli ki trok heh kiba la kit shini, ki la pyrshang ban jam sha shiliang lyngba kane ka jingkieng ha kajuh ka por. Kumta dei namar ka jingbym lah kyrda ka la pynlong ïa kane ka jingtei ban hap jraiñ shapoh ryngkat ki trok ha kaba ki byrni shini ruh ki la hap lut shapoh ka wah Bagla.
Kane ka jingkit shini ba khia da ki phew phew ton sha South Garo Hills, ka la pynsuba sniew ba ka lah ban dei ka kam khaïi tuh namar ïa ka shini la pynïaid lyngba kane ka surok ba shu pynïasoh ym na ka surokbah ha Dalu.
