Shillong, Ïaïong 16
Ban lait na ka jingmynsaw ki rangïalehkai, ka Shil-long Sports Association (SSA) ka la hap ban pynsangeh ïa ka jingïalehkai jong ka Shillong Premier League 2023 ha ka Sngi Ba-ar na ka daw ka jinglang um ka madan hadien ba ther u ‘lap-bah.
Kat kum ka prokram ka jingïalehkai ha kane ka sngi ka long hapdeng ka Langsning FC pyrshah ïa ka Ryntih SC.
Ha ka jingshisha kane ka jingïakhun ka long kaba kham kongsan na ka bynta ban ïoh jaka ha ka kyrdan basaw, hynrei na ka daw ka jingjur u slap uba la neh kumba shiteng kynta katei ka madan kam long shu ban ïalehkai. Te na ka liang ki dkhot katei ka synjuk ki la leit ban jurip ïa katei madan bad hadien ki la rai ban pynsangeh noh ïa ka jingïalehkai.
Ha ka jingshisha ka Sorkar ka la pynlut haduh T. 14 klur tam ban siang ïa u phlang plastik bad ruh ka jingpynïeng ïa ki flood light, hynrei katei ka madan ka la nang ïai paw ki dak ki shin ka jingpyntrei torti tang mar ïa wan u slap ba jur.
Kat kum ka jingbatai ha u snem ba la dep da u karikor ba pyntrei ïa katei ka projek, la ong ba katei ka jinglang jong ka um ka dei tang na ka daw bym pat ïoh ka jaka ban pyntuid ïa ka um ha ka por ba slap.
Kane ka jingpyntuid ïa ka um kam dei shuh na kaba rim, hynrei la thmu ban pyntuid lyngba ka muri bah ka ban ïaid napoh khrum jong ka surok kaba wan na JN Stadium. Hynrei ïa kane ka muri bah ym pat shym la lah ban sdang ïa ka haduh mynta namar ka dang don hapdeng ki kynrum-kynram hapdeng ka States Sports Council of Meghalaya bad ka Shillong Recreation Ground Trust (SRGT).
Lada ïa katei ka madan ïalehkai ha First Ground Polo ym lah ban leh eiei halor ka jingdap um, ka lah ban pynpulom noh ïa ki lympung ïalehkai jong ka SSA ki ban nang ïai bteng nangne shakhmat, kynthup ïa ka SPL 2023 ka dang jam shaphrang mynta.
Kumta na liang ka SSA kan sa pynbna ïa ka tarik na ka bynta kane ka jingïalehkai kaba la pynsangeh mynta ka sngi.
Ha kawei pat ka liang, ka jingïalehkai ha ka Sngi Balang kan long hapdeng ka lahduh jong ka aïom ba la dep, ka Mawlai SC pyrshah ïa ka Nangkiew Irat SC ha ka por 3 baje janmiet.
