Shillong, Ïaïong 16
U MLA ka BJP na South Shillong, Bah Sanbor Shullai u la ong ba lada ka Kong Ampareen bad ka Agatha Sangma ki ïoh rah ïa ka nam jop, ka Meghalaya kan ïoh ïa ki nongmihkhmat Khristan kiba khlaiñ ha ka sorkar NDA.
“Namar lada baroh ar ngut kin ïoh rah ïa ka jingjop, ki lah ban rah bad ban kren na ka bynta ka bha ka miat kaba ïadei bad ki Khristan, namar ki don bynta lang bad ka sorkar. Ka jinglong pyrshah Khristan da ka liang pyrshah kan tlot lada baroh ar ngut kin shah jied na Meghalaya,” la ong u Bah Sanbor ha ka kyrwoh khubor ba la pyllait.
Une u nongïalam ka BJP ha Meghalaya u la ong ba ki nongmihkhmat ne MP na kiwei pat ki seng kin nym lah ban leh shibun kiei-kiei ha ka ïingdorbar thawaiñ ka ban don la kumno-kumno 400 ngut ki dkhot katkum ka jingwad bad lum jingtip jong ki tyllong wad jingtip, kumta ban phah da ki nongmihkhmat na ka Congress ne na ki seng riewlum kan pynlehnohei ne pynduh jingmyntoi haduh 5 snem ïa ki paidbah.
U Bah Sanbor u la kynthoh jur ïa kiwei pat ki seng saiñ pyrthei kiba la ju kynthoh ïa ka BJP ha ki rynsan bad u la ai jingmut ruh ïa ki paidbah khamtam ïa ki samla bad ïa ka imlang-sahlang ba kiwei ki seng saiñ pyrthei ki la shu pyntieng kohtympan ban dup ïoh ïa ka jingkyrshan ha Meghalaya.
“Ngi dei ban ïaid shaphrang bad puson bha ha ka ïoh ka kot, ym ban pynpharia ïa ka imlang-sahlang jong ngi. Lada ki nongjied nongmihkhmat ki kwah ïa ka Shillong ban don beit ha ka jingsuk ki dei ban pynmih la ki sur ha ka 19 tarik u Ïaïong, 2024. Khlem ka jingshong suk yn nym don ka jingïaid shaphrang ha ka ïoh ka kot ka jylla,” la ong u Bah Sanbor.
U la ong, ka Shillong ka dei ka jaka ba don ka lad ban ïeng rasong ha ka IT ha kane ka thaiñ shatei lam-mihngi bad kan ïarap ïa bun ki samla ba la dep pule ban ïoh kam. “U paidbah u dei ban sngewthuh ba khlem ka shong suk shong shngaiñ ym lah ban kyntiew ïa ka ïoh ka kot. Da ka jingkyrshan na ka jylla bad ka sorkar pdeng, ngin ïeng tylli lang bad nym shah ba ki jingsniew kin wan ha ka jylla jong ngi,” la ong u Bah Sanbor.
U Bah Sanbor u la ong ruh ban pharia ïa ka ‘vote’ hapdeng ka NPP bad Congress kan ai jingmyntoi tang ïa ki kyrtong jong ki seng riewlum namar kin ym don sur ne lah leh eiei ha ka dorbar ba bun da ki kyrtong ka NDA. U la pynkynmaw ruh ba kiba bun ki nongïalam BJP ha ka jylla ki dei ki Khristan ba shitrhem bad kumta yn kren bad ïeng na ka bynta ka jingbha jong ki Khristan.
“Ngi kut jingmut ba ngin ïada ïa ka jingdonkam jong ki paid Khristan, ki Seng Khasi, Seiñ Raij bad baroh kiba shong ba sah hapoh ka jylla jong ngi,” la ong u Bah Sanbor.
