Shillong, Ïaïong 16
U MDC ka UDP bad MLA barim jong ka Nongkrem, Bah Lambor Malngiang u la kiew sha rynsan ha jingïalang ha ïew Smit, East Khasi Hills District ha ka Sngi Ba-ar ban pyni paidbah ba u la kyrshan ïa ka Kong Ampareen Lyngdoh kaba dei ka kyrtong NPP ban ïakhun ïa ka ilekshon MP Lok Sabha na Shillong konstitwensi.
Haba ai jingkren ha kane ka jingïalang u Bah Lambor Malngiang u la ong ba ka Nongkrem konstitwensi ka dang bhabriew sah haduh mynta dei namar ba ma u, u la dep ban leh eiei ha ki 5 snem.
U la ong ba ka jingbha ki lynti ki syngkien, ki skul, ki ïing dorbar shnong dei ka jingwanrah jong u.
Nalor nangta, u la pynkynmaw ba hadien 8 bnai ba u Bah Ardent u la long kum u CEM ka KHADC ym don aiñ eiei ba u shna, hynrei u shna pynban da ka aiñ ai jaid sha u kpa.
U Bah Lambor u la ong ruh ba u Anna Hazare u shah jingit ha rynsan kaba la shu tap najrong, hynrei u Bah Ardent u shah jingit da kaba buh sa kawei ka kamra kyrpang.
U la ong ba u hap ban kren ïa ka jingshisha wat la kin sa don ban ai ejahar sa ïa u ruh un nym sngew eiei.
“Ka ri India ka la ithuh lut ïa ka riam tynrai ka rilum Garo ngi donkam ban phah sa ïa ka Kong Ampareen khnang ba ka ri India kan ithuh noh sa ïa ka riam tynrai ki Khasi” u la ong.
Ki nongkren thymmai kiba la mih ban ïalap ïa kane ka ilekshon MP ha Smit ki long u Bah Ngaitlang Dhar uba dei ruh MLA barim ka Umroi konstitwensi, u la ong ba u nongïalam ka VPP, Bah Ardent Basaïawmoit haba u leit sha Jaiñtia u la kynnoh ïa ka seng NPP kaba tuh bad u la kynnoh ruh ïa ka Dhar Company kaba la klun lut ban shna surok.
“Ha ka jingshisha u Bah Ardent u la dei ban ïaroh ïa ka Dhar Company ha jaka ban wan trei ki kompani na Mumbai bad Delhi” u la ong.
U la ïathuh ba ka Dhar Company ka la ai-kam palat 2,000 tylli ki longïing bad 3,000 ngut kiba ïoh bylla.
Nalor nangta, u la pyntip haba u Dasakhiat u wan tyrwa ban ïakhun na Nongkrem konstitwensi u la ïoh ban shna ki madan phutbol, ki ïing baduk; hynrei uta uba kob ba ieid jaidbynriew u khlem leh eiei.
Ha kane ka sngi la ïoh jingkren ruh na ka Kong Ampareen Lyngdoh, Bah Prestone Tynsong, Bah Sniawbhalang Dhar bad la pynïaid ïa ka jingïalang da u Sordar ka Smit.
