Jowai, Ïaïong 16
Ka Synjuk Waheh Shnong Ri Jaiñtia (SWSRJ) ka kyntu ïa ki nongshong shnong kumjuh ki nongïalam shnong ka rilum Jaiñtia kynthup ka East bad West Jaiñtia ban ïatreilang bad ki bor pynïaid District ha kane ka ilekshon MP ka ban long ha ka 19 tarik.
U President ka Synjuk Waheh Shnong Ri Jaiñtia Bah Arminius Lipon u la ong, ka Synjuk ka kyntu ïa ki nongshong shnong bad nongïalam shnong ban long ki briew kiba don ka akor burom bad ri kyndong ïa ka jingsynshar ha ki dong ki shnong khnang ba ka ilekshon sha ka dorbar bah jong ka ri kan long kaba ïaid beit ïaid ryntih bad kaba jop khlem da don ka jingpeit shiliang khmat ïano-ïano.
La kyntu ruh ïa ki nongshong shnong ban nym thaw ïa kino-kino ki jingkulmar kiba lah ban pynwit ïa kino-kino ki kam kiba wanrah ïa ka jingsniew dur hapoh jong ka rilum Jaiñtia.
Ka Synjuk ka la kyntu ruh ïa ki waheh shnong ka rilum Jaiñtia ban kiar na kaba buaid politik hynrei ban long ki nongïalam kiba sian ha ka synshar-khadar shnong.
Nalorkata, ka Synjuk ka la kyntu lang ruh ïa baroh ban long ki nongshong shnong kiba peitngor khnang ban lait na kano-kano ka jingjia khamtam ha ka sngi thep ‘vote’.
La kyntu ruh ïa ki nongshong shnong ka rilum Jaiñtia kiba shong ba sah sha khappud bad ka jylla Assam ba kin wan thep ïa ka ‘vote’ jong ki.
Ka Synjuk ka la kyntu jur ïa ki waheh shnong ban pynbiang ïa ki jingdonkam kum ka bording, ka um bad kiwei ki jingdonkam na ka bynta ki briew jong ka sorkar kiba wan ha ki shnong ki thaw ban pynïaid ïa ka ilekshon.
