Shillong, Ïaïong 16
Ki pulit pahara na ka bynta ka jingpynlong ïa ka jingthep ‘vote’ ha kane ka ilekshon Lok Sabha ki la poi lut sha kane ka Jylla baroh 40 pyrton.
Ka jingthep ‘vote’ na ka bynta ka Shillong Parliamentary konstitwensi bad Tura Parliamentary konstitwensi kan long ha ka 19 tarik mynta u bnai.
U Chief Electoral Officer (CEO), u Dr. B.D.R Tiwari u la ïathuh ba ki pulit pahara Central Armed Police Force (CAPF) ki la poi lut baroh 40 pyrton ha kaba 18 pyrton kin leit ban pahara ha ki jaka thep ‘vote’ kiba hap ha Tura Parliamentary konstitwensi bad 22 pyrton ki pulit CAPF kin pahara ha ki jaka thep ‘vote’ kiba don ha Shillong parliamentary konstitwensi.
Baroh ki don 3,512 tylli ki jaka thep ‘vote’ ha kaba 2,288 tylli ki don ha Shillong parliamentary konstitwensi bad 1,224 tylli ki jaka thep ‘vote’ ki don ha Tura Lok Sabha konstitwensi.
Ha East Khasi Hills district ki bor pahara ki kham bun pyrton namar ki MLA konstitwensi ruh ki don 17 tylli bad ki don ruh ki jaka kiba hap ban kham pynkhlaiñ ïa ka jingpahara.
U CEO u la ong ba ki don ruh ki jaka thep ‘vote’ kiba don jingma bad kiba kham don jingma shuh shuh ha kaba ka jingpahara ruh hap pynkhlaiñ.
