Shillong, Ïaïong 16
Ka kynhun jong ki samla kiba la thep kam pulit ha ka Sngi Ba-ar ki la leit tur sha ka jaka treikam jong ka Central Recruitment Board (CRB) kaba don ha Mawroh ban pan jingpynshai ha kaba ïadei bad ka rta thep kam pulit kaba la pyllait da ka sorkar jylla ha kine ki khyndiat sngi ba la dep.
Ka jingwan ki samla thep kam hapoh ka jingïalam jong ka samla Barilang Pyngrope, ka dei namar kim sngewïahap ïa ka rta rung kam ha ka tnat pulit kata na ka rta 18 snem haduh 21 snem bad kine samla ki la dawa ruh ba dei ban pynjlan ïa ka rta thep kam.
Na ka liang ki samla kiba wan pan jingshai na ka Secretary jong ka Central Recruitment Board ki la ong ba ki kwah ba ka sorkar kan pynkiew biang ïa ka rta thep kam namar 18 haduh 21 bun ki samla kim pat lait na ki jingpule.
Kine ki samla ki la ong ruh ba kane ka jingpynrit ïa ka rta ka ktah bha ha ki por ba ka dang sar ka khlam Covid-19 hapoh ka jylla bad bun ki samla ki la shu heh snem bad ka long lehnohei ïa ki jingpynkhreh baroh.
Shuh shuh ki la ong ka shong ha ka sorkar ban kyntiew biang ïa ka snem thep kam pulit katno snem, tangba ïa kane ka snem ba ki pyllait mynta kim sngewïahap.
Na ka liang ka samla Barilang Pyngrope kaba la lam lynti ïa ki samla ka la ong ba namar ba kim ïoh ïa ka jubab kaba pynhun na ka Secretary ka CRB kin ïaid shakhmat ban dawa.
