Shillong, Ïaïong 16
Ha ka sien kaba khatduh shwa ban poi sha ka sngi jingthep ‘vote’ na ka bynta ka ilekshon MP sha ka ïingdorbar ka Lok Sabha ka ban sa long ha ka 19 tarik u Ïaïong 2024 kaba hap ha ka Sngi Thohdieng mynta ka taïew, ka Hynñiewtrep Integrated Territorial Organisation (HITO) ha ka Sngi Ba-ar ka la leit ban hiar biang sa shisien ban pynsngewthuh paidbah halor ka jingkordor ban thep ïa ka ‘vote’ jong ki na ka bynta ban jied ïa u MP khamtam napoh ka 1-Shillong Parliamentary Constituency.
Kum ban shu kdew hangne, na ka liang ka HITO Student’s Wing ha kine ki khyndiat sngi kiba dang shu dep ka la leit sha ki jaka pule bad kumjuh ruh sha ki paidbah kiba ïaid ba ïeng ha ki lynti ki syngkien ban pynsngewthuh ïa ki paidbah ha kaba ïadei bad ka jingkordor jong ka ilekshon MP. Kane ka long ruh ba kum ki nongshong shnong jong ka jylla ki dei ban thep ruh ïa ka ‘vote’ jong ki da kaba puson bha khnang ba kyrtong ban long MP dei ban long nongmihkhmat ban wanrah ïa ka roi ka par, ka bha ka miat bad ban pynsngew ruh ïa ki mat ki jura jong ki paid Khasi bad Jaiñtia hapoh ka Parliament.
Hynrei ha kane ka sngi, na ka liang u President rangbah ka HITO Sengkmie, u Bah Donbok Dkhar u la hiar hi noh dalade ban pynsngewthuh paidbah hapoh Ïewduh halor ka jingkordor ban thep ïa ka ‘vote’ jong ki ha kane ka ilekshon MP.
Ka jingkitkhlieh jong ka seng ban mih madan ban pynsngewthuh paidbah ka long ba kum ki paidbah ki dei ban sngewthuh ïa ka hok bad ka bor kaba ki don khamtam ïa ki paradoh parasnam ba kin mih shakhmat ban thep ïa ka ‘vote’ jong ki namar ka bor kaba shisha ka shong ha ki sympriah kti jong ki paidbah ban wanrah ïa ki jingkylla bad ki jingbha na ka bynta ka jylla.
