Vijayawada, ïaïong:
Ki pulit jong ka NTR ki la pynbna ban ai ka buskit T. 2 lak na ka bynta kito kiba lah ban ai jingtip shaphang ki runar kiba thombor ïa u Myntri Rangbah jong ka Andhra Pradesh u YS Jagan Mohan Reddy.
Ki pulit ki la ong ba ki briew kiba kwah ban ai jingtip halor kane ka kam thombor kin lah ban pyntip sha u Deputy Commissioner of Police jong ka NTR u Kanchi Srinivasa Rao bad sha u Additional DCP of Task Force u R Sriharibabu.
“Kito kiba kwah ban ai jingtip shaphang kane ka jingjia ki lah ban ïakren ruh lyngba ka phone, ka WhatsApp, ne ïakynduh markhmat,” la ong ka jingthoh kaba la wan na ka tnat pulit, ha kaba la bynrap shuh shuh da kaba ong ba yn sa buhrieh noh ïa ki jingtip ba bniah jong kine ki nongai khubor. Na ka bynta u DCP lah ban phone ha u Phone Number 9490619342 bad ïa u Additional DCP ha u Phone Number 9440627089, la bynrap ka jingthoh.
U Reddy u la mynsaw ha ka por ba la don ka jingïalap ilekshon ha surok ha Vijayawada ha ka Sngi Saitjaiñ. Ka la don ka jingkawang maw ha ka por ba don kane ka jingïalang paidbah, ha kaba uwei u maw u la leit dei ïa u Myntri Rangbah na ki bynta jong ka shyllang mat.
U MLA jong ka Yuvajana Sramika Rythu Congress Party (YSRCP) u Vellampalli Srinivasa Rao, uba la don lang bad u Myntri Rangbah ha ka jingïalang paidbah, ruh u la mynsaw. U Jagan Mohan Reddy u la shah sumar hapoh ka bos bad hadien kane u la bteng biang ïa ka jingïalap ilekshon jong u, ka ‘Memantha Siddham Bus Yatra’.
