Shillong, Ïaïong 16
Ki paidbah na ka thaiñ Thynroit ki la pyni shisha ïa ka jingieid ïa ka Congress bad ïa u kyrtong kane ka seng, u Bah Vincent H Pala da kaba poi sha ka jingïalang kaba la long ha shnong Thynroit ha ka miet Sngi Ba-ar ban ai jingkyrshan ïa ka seng ha kane ka kynti na ka bynta ka jingshngaiñ jong ka Ri bad ka Jylla.
Ki paidbah ka thaiñ Thynroit bad ki shnong ba marjan ki la wan ban sngap ïa ka jingpynshai jong ki nongïalam ka Congress naduh u Bah Pala, Bah Pynshngaiñlang N Syiem, nalor u Bah Hilarius Warbah ha kaba ïa ka jingïalang la pynïaid da u Sordar ka shnong Thynroit u Bah Harkin Warjri.
Da ki hajar ngut ki paidbah naduh ki longkmie, longkpa bad samla kynthei bad shynrang ki la wan sha kane ka jingïalang ha kaba ki la ïohsngew ïa ki jingpynshai jong kine ki nongïalam ka Congress kiba la kyntu ïa ki paidbah ban nym duh jingkyrmen namar ka jingshah lehbeiñ ka Congress ha ka BJP ka la nang pynrhem ïa ka mynsiem ïakhun jong ki paidbah na ka bynta ban ïada la ka hok hapoh ka ri India baroh kawei.
U Bah Pala u la pynshai ïa ka nongrim jong ka Congress ban ïada ïa baroh ki nongshong shnong bad baroh ki jingngeit namar ka ri India ka dei ka ri synshar paidbah bad kaba burom ïa baroh ki jingngeit katkum ka Riti Synshar jong ka ri.
U Bah Pala u la pynshai ruh ïa ka mang treikam ilekshon ka Congress na ka bynta ki nongshong shnong kiba ïahap ruh bad ki briew ha Meghalaya naduh ki nongrep bad jingïarap ïa ki samla kiba la pyndep jingpule bad ïa ki longkmie na ki longïing baduk bad kiwei-kiwei ki jingplielad ïa ki samla.
U la ong ba ka Congress ka donkam ka jingkyrshan ban khlaiñ ha Parliament ban ïakhun ïa ka BJP ba kan nym poi sha ka thong kumba ka la buh ban ïoh 370 ngut ki MP haduh 400 ngut, namar ka jingthmu ban ïoh MP haduh katne ka dei kaba don shalyndet ban pynkylla ïa ki riti ki dustur lyngba ka UCC bad ka jingpyntreikam ïa kiwei ki aiñ kiba ktah ïa ki jaitbynriew bapher-bapher kiba don hapoh ka ri.
U Bah Pynshngaiñlang N Syiem u la kren shaphang ka jingpynneh ïa ka rukom synshar shnong kaba la don naduh hyndai hangne ha ri Khasi Jaiñtia bad ka jingdonkam ban nang pynkhlaiñ ïa ka Khyrnit bahynriew lane District Council hapoh ka riti synshar jong ka ri.
Na ka liang u Bah Hilarius Warbah u la kren shaphang ki khajna bad jingïoh lum pisa ka BJP lyngba ka electoral bond bad ka jingma ïa ki ritpaid namar ka BJP kam kwah ban pynneh ïa ka suk ka saiñ da kaba ai nuksa ïa ka jingumsnam ha Manipur ha kaba ki ritpaid ki shah thombor kat haduh kine ki sngi namar ka BJP ka leh bym salia. Kumta ki nongïalam ka Congress ki la kyrpad ïa ki paidbah ban ai ka jingkyrshan ha kane ka kynti na ka bynta ka jingshngaiñ jong ka jaitbynriew, ka Jylla bad ka ri baroh kawei.
Ha kane ka jingïalang ki paidbah ki la shad ïa ka jingrwai jong ka Congress bad ai khublei kitbok ïa u Bah Pala ba un jop biang ha kane ka kynti kum u MP ban pynkhlaiñ ïa ka Congress.
