Shillong, ïaïong:
La ïoh jingtip ba don shibun ki dur-khih bad ki jingkren kiba batai shaphang ki rukom kheng pisa ne bei tyngka kiba la shna thok da kaba pyndonkam ïa ki bor teknoloji, ha kaba la pyndonkam ïa ka sur bad ka dur jong u Ashishkumar Chauhan, MD & CEO NSE. La lap ba ïa kine ki dur-khih la shna da kaba pyndonkam ïa ki teknoloji kiba katkum kane kajuk mynta ban pyrthuh bud ïa ka sur bad ka dur jong u Ashishkumar Chauhan, MD & CEO ka NSE.
Kumta la kyntu ïa ki nongkheng ne nongbei tyngka ba kin long kiba husiar bad ba kim dei ban ngeit ïa kine ki sur bad ki dur-khih bad ba kim dei ban bud ïa kum katei ka jingbatai ban bei ne kheng pisa ne kino-kino ki jingbatai ba ki ïoh na kine ki video thok ne kino kino ki rynsan pynbna.
Lah ban kdew hangne ba ki nongtrei ka NSE kim ïoh ïa ka hok ba kin batai ïa kino kino ki Stock ne ba kin leh eiei ïa kine ki Stock. Ka NSE India ka ïaleh katba lah ban kyrpad ïa kitei ki rynsan ba kin weng noh ïa ki dur-khih kiba don ka jingpynthuh, ha kaba ïa kino-kino ki jingbthah lah ban ïoh tang lyngba ka website ba tikna jong ka bad kumjuh na ki rynsan Social Media jong ka kum ka Twitter, Facebook, Instagram, LinkedIn, bad YouTube, katkum ki kyndon jong ka NSE.
Ka NSE ka kyntu ïa baroh ba ki dei ban pyntikna shwa ïa ka thymmei jong kitei ki jingpynbna bad ki jingbthah kaba long na ki, bad kumjuh ruh ban peit ïa ki rynsan Social Media ba tikna jong ki. La bthah ïa ki nongbei ne ki nongkheng pisa ba ki dei ban da peit bha ïa ki jingtip ba la ïoh na ka NSE ne na ki nongtrei ba tikna jong ka ïa kaba lah ban ïoh na ka website, www.nseindia.com, bad kumjuh ruh ïa ki briew salonsar.
