Sydney, ïaïong:
Ki pulit ka Australia ha ka Sngi Nyngkong ki la ai jingpynshai khyndiat katba ki dang tih bniah bad wad bniah ia ka daw halor ka jingleit thombor u rangbah 40 snem ia ki paidbah hapoh ka iew iadie-iathied da kaba pyndonkam tang da ka tari heh. Hynrei la ong ba utei u rangbah u dei uba don jingshitom ha ka bor pyrkhat bad kaba kham sngew lyngngoh pat ka long ba balei utei u briew um shym thmu ban pynmynsaw ne ktah kti ia ki shynrang, katba u ialeh ban thombor bad pynmynsaw tang ia ki kynthei. Ha kane ka jingjia la ong ba 6 ngut ki la duh ei ia ka jingim ha katei ka sngi bad katto-katne ngut pat ki la ngat bad mynsaw.
Katkum ki video ba la saphriang paidbah, la iohi ia utei u briew uba la ithuh kum u Joel Cauchi katba u dang leit ban thombor ia ki paidbah kiba don ha katei ka jaka iew (Mall) ha katei ka sngi hynrei la iohi ba u ialeh ban tur bad thew tang ia ki kynthei watla u don ha ka jaka paidbah kaba baroh ki don lang hajuh bad kynthei bad shynrang. Katei ka jaka iew ka don ha Westfield jong ka Bondi Junction bad kane ka la jia ha ka Sngi Saitjaiñ jong kane ka taiew ba la lah.
Shuh shuh ruh la ong ba 5 ngut napdeng kitei ki 6 kiba khlad, ki dei ki kynthei bad bun na kitei kiba mynsaw ruh ki dei hi ki kynthei. Kumta la sngewthuh ba utei u briew u don ka jingthmu ban thombor tang ia ki kynthei.
Hynrei la ong ba ki pulit kim lah ban pei- phang ia kaei kaba don ha ka jingmut- jingpyrkhat jong utei u briew namar um da beit ban iakren haba kylli bad tohkit bniah ia u.
Kumta, ki pulit tohkit ki hap ban ialeh shitom ban tohkit lyngba kito kiba don jingiadei lane kiba iajan bad ithuh bha ia utei u rangbah.
Katkum ki jingtip ba la ioh lum na ka ‘Facebook Account’ jong u Cauchi, la ong ba u dei na Toowoomba, najan Brisbane bad u la lah ban pyndep ia ka skul bad u la lait ruh na ka skulbah hynrei um shym la pynpaw paidbah ha katei ka rynsan ‘Social Media’ ia kitei ki jaka pule kiba u leit pule ha ki por ba la leit.
