United Nations, ïaïong:
U nongrah ktien jong ka Iran sha ka United Nations haba iakren bad ka tnat Security Council ha ka Sngi U Blei u la ong ba ka Islamic Republic ka pyndonkam ia ka hok la jong ban iada ia u pud-u sam da kaba phah ruh ia ki jingmaham sha kito ki ri kiba pyni bor bad leit thombor ia ki tnat jongka ha kine ki khyndiat por ba la leit.
Kumta, utei u heh nongrah ktien jong ka Iran u la ong ba ka Iran kam don lad da kumwei pat ban pynsngewthuh bad maham ia ka Israel lait da kaba pyni ia ka bor jong ka, khnang ba kan long ka jingmaham kaba kham shai ia ka Israel ba kan sngewthuh ba kam bit ban pynthut ia ka Iran ne ia ki tnat jongka kiba don ha kiwei pat ki ri.
Kane ka jingkren jong utei u heh ka Iran ka long halor ka jingleit thombor jong ka Israel ia ka tnat ba dei khmih ia ki nong Iran ‘Embassy’ hapoh ka nongbah Damascus jong ka Syria ha ki khyndiat taiew ba la leit.
Dei namar kane ba ka Iran ka bitar bad pynpaw ia ka jingdom jongka da kaba shim ruh ia ka rai ban ai jingsneng ia ka Israel bad ban pynphai kylliang ia ka jingleit thombor jong ka Israel sha katei ka jaka ba don ka tnat ‘Embassy’ jong ka Iran hapoh Syria.
Haba peit thuh ruh ia ka long ka man hapdeng ka jingiakynad jong ka Israel bad ka Iran, la iohi na baroh arliang hi kim shym don ka jingpyndem iwei ia iwei. Dei na kane ka daw kaba lah ban wanrah ia ka jingiakynad kaba kham jur bad kham shyrkhei bad kaba lah ruh ban ktah jur ia ka pyrthei baroh kawei haduh ban poi shaduh u pud jong ka thma bah ha ka pyrthei baroh kawei.
Hynrei na ka liang kitei ki heh nongialam bakhraw jong ka pyrthei, ki la maham tyngeh ia ka Israel bad Iran bad ki la bthah ruh ia kitei ki arliang ri ba ki dei ban ialeh ban tehlakam ia kum kine ki jingeh bad ban pyndem markylliang da kaba plie lad ia ki jing-iakren iasuk ban lait na ki jingma kiba khraw.
