Shillong, Ïaïong 16
Ki hajar bad lak ngut ki paidbah ka Jylla Meghalaya kiba don shabar ka Jylla naduh kiba trei, kiba pule bad kiwei kiwei kim donlad da kumwei pat ban ïoh thep ïa ka ‘vote’ jong ki lait tang lada ki wanphai sha jaka lajong ban thep ‘vote’ ha ka 19 tarik mynta u bnai.
U Chief Electoral Officer (CEO), u Dr. B.D.R Tiwari u la ong ba ka Election Commission of India kam pat thaw ki lad ban thep ‘vote’ da kiwei pat lait na kaba wan thep ‘vote’ sha jaka lajong namar ka lad ban thep ‘vote’ na la ïing ruh ka dei tang ïa kiba la kynjoh 85 snem ka rta bad kiba don jingduna ha ki dkhot met.
U la ong ba ym don jingkheiñ satia kaba kyrpang katno ngut ki briew kiba na Meghalaya ki don shabar Jylla naduh kiba leit trei bad leit pule bad kiwei kiwei ki kam, namar uno-uno ne kano-kano na ki nongthep ‘vote’ ki hap ban wan beit sha Jylla lajong ban leit thep ‘vote’ ha kato ka jaka kaba ki dei shnong ne ki don ka kyrteng thep ‘vote’.
Da ki phew hajar ngut ki briew ka Jylla ki don shabar bad lada kim wan sha Jylla lehse tang na kine ruh ka jingwan thep ‘vote’ ka la hiar ei ha Jylla.
