Ranchi, ïaïong:
Ka ïingbishar bakyrpang ha Ranchi hynnin ka sngi ka la pyntikna ba ka 23 tarik, Ïaïong kan long ka sngi ban bishar bniah halor ka jingkyrpad jamin jong u Myntri Rangbah barim jong ka Jharkhand u Hemant Soren hadien ba ka kynhun Enforcement Directorate (ED) ka la buh ka jingkyrpad ban pan por bad phah ka jubab halor kane.
U Soren u la buh ïa kane ka jingkyrpad shah pyllait jamin ha ka lah sngi U Blei.
“Ka kynhun ED ka la pan por na ka bynta ban ai ïa ka jubab halor kane. Ka ïingbishar ka la buh ïa ka tarik kaba tikna kata ha ka 23 tarik, ba kan long ka sngi ban bishar bniah halor ka jingkyrpad jong Soren,” la ong u nongïasaid aiñ jong u Soren u Pradeep Chandra.
U Soren u la shahkem halor ka jingshah kynnoh donkti ban kamai ïa ka spah bymhok ha u Kyllalyngkot khyndiat minit hadien ba u la iehnohkam kum u Myntri Rangbah.
Ka kynhun ED ka la kynnoh ba u Soren u la long uba hakhmat eh ban ïoh jingmyntoi ha ka jingpyntreikam beaiñ kaba la mih na ka jaka kaba don ha Ranchi.
Ka kynhun jong ki nongïarap bad ki heh spah kiba la shah pynshisha ba ki la trei da palat snem ki la leh thok halor kawei ka jaka da kaba buh da ki jingthoh ki bym shisha ha ka ophis treikam ha kaba ïadei bad ka jingdie ïa ka.
U Soren u la ïai kyntait na ka por sha ka por ha kaba ïadei bad kane ka jingshah kynnoh bad ong ba kane baroh ka long tang ka jingleh kam saiñ pyrthei, ha kaba u la ong ba ki jingtip ba bniah baroh halor ka spah jong u kaba u don ki dei kiba paw pyrthei.
