Aizawl, ïaïong:
Ki heh ba dei khmih ha ki kam ilekshon, ki la pynbna ba ha kaba ïadei bad ka ilekshon Lok Sabha ban wan ha Mizoram, ki la don palat 6,500 ngut ki shipai pahara, palat 3,000 ngut ki pulit bad 12 tylli ki kynhun jong ki shipai ka Central Armed Police Forces kiba la shah pyntreikam.
Ka jingthep vote ka ban long tang ha kawei ka Lok Sabha konstitwensi ha ka jylla kan sa long ha ka sngi Thohdieng.
U Chief Electoral Officer (CEO) jong ka Mizoram u Madhup Vyas, u la ong ba ka Election Commission ka la pynkhreh ha kaba ïadei bad ka jingpynlong ïa ka ilekshon Lok Sabha.
U la ong ba ki la don kumba 6,500 ngut ki shipai pahara ki ban sa treikam ha ka ilekshon ban wan, bad kine ki la don bynta ha ka jingpyntbit kaba la long ar sien.
U la pynshai da kaba ong ba ka bynta kaba lai bad kaba khatduh na ka bynta ka jinghikai pyntbit kan sa long mynta ka sngi ka sngi Balang bad lashai ka sngi ka sngi Palei.
U Vyas u la pynshai shuh shuh da kaba ong, ba ki heh ba dei khmih ki la dep ban mang ïa kumba 168 tylli ki jaka thep vote, ha kaba ïa kine ki shipai la phah mynta ka sngi sha ki jaka ba ki dei ban don, ha kaba ïa kiwei pat ki kynhun ba sah yn sa phah ha ka sngi Palei.
U la pynshisha da kaba ong ba ka Election Commission ka la dep ban pynbiang na ka bynta ki jingïada, ha kaba la pyntreikam ïa ki 12 tylli ki kynhun jong ki shipai ka Central Armed Police Forces (CAPF), kynthup 7 kynhun jong ki Central Reserve Police Force (CRPF), 3 kynhun jong ki Indo-Tibetan Border Police (ITBP), bad 2 kynhun jong ki Border Security Force (BSF), ha ryngkat ka jingpyntreikam da palat 3,000 ngut ki pulit jong ka jylla na ka bynta ka ilekshon ha kylleng ki jaka jong ka jylla.
