Shillong, Ïaïong 17
U Deputy Commissioner (Election) jong ka East Khasi Hills ha ka hukum kaba u la pynmih, u la bthah ïa baroh ki jaka pule la ki dei jong riewshimet ne jong ka sorkar kiba don ha sor Shillong ba kin khang khyrdep lashai ka sngi ka 18 tarik Ïaïong.
Ha ka hukum ba la pynmih, u DC u la pyntip ba ka jingbthah ban khang khyrdep ïa baroh ki jaka pule ka dei namar ba ha kane ka sngi kan don ka jingïaid jingïeng jong ki kynhun pynïaid ilekshon hapoh ka 1-Shillong Parliamentary Constituency.
Shuh shuh ha kane ka hukum ba la pynmih ha ka Sngi Balang, u DC u la ong, “Namar ka ilekshon sha Lok Sabha 2024, la bthah ïa baroh ki jaka pule ka Sorkar bad shimet/ ki skul /kolej/ITI kiba hap hapoh ka Shillong Urban Area ba kin khang khyrdep ha ka 18 tarik namar ka dei ka sngi ïa ïaid ïa ïeng jong ki kynhun pynïaid ilekshon hapoh ka 1-Shillong Parliamentary Constituency”.
Kumta na ka liang jong u District School Education Officer ka East Khasi Hills District bad baroh ki Principal/Registrar/ki bor pynïaid jong ki jaka pule kin hap ban pyntreikam ïa kane ka hukum.
