Nongstoiñ, Ïaïong 17
Kum shi bynta ban tehlakam ïa ki kam sniew kam runar hapoh ka sor Nongstoiñ, ka Hynñiewtrep National Youth Movement (HNYM) West Khasi Hills ha ka 17 tarik mynta u bnai ka la leit ban ïakynduh ïa u Deputy Commissioner (DC) ka West Khasi Hills ban kyrpad pynbiang ïa ki street light, ki kor CCTV bad ki pulit pahara ha ka por mynmiet hapoh ka sor Nongstoiñ.
Na ka liang ki nongïalam ka HNYM ki la pynpaw ba kane ka jingkyrpad jong ka seng ïa u DC ka long halor ki nongrim ban tehlakam ïa ki kam sniew kam runar hapoh sor Nongstoiñ namar katba nang mih ki sngi ki kam sniew kam smeh hapoh ka sor Nongstoiñ ki la nang jyllei khamtam ha ki por miet kaba la wanrah ruh ïa ki jingjia kiba shyrkhei.
Shuh shuh ki la ïathuh ruh ba ha katei ka jingleit ïakynduh, na ka liang jong utei u khlieh ka District u la kular ba un sa shim khia ïa kitei ki mat. U la ong ruh ba un sa shong jingïalang bad ki nongïalam shnong ki kynhun seng khamtam bad ki VDP shnong ryngkat ki bor pulit ban ïa pyrkhat.
