Shillong, Ïaïong 17
Ka jingïalap ilekshon ha baroh kawei ka Meghalaya ka la kut noh ha ka janmiet Sngi Balang ha ka por 4 baje, kaba long ruh 48 kynta shwa ban poi sha ka sngi thep ‘vote’ na ka bynta ban jied ïa ki dkhot sha ka ïingdorbar Parliament ha Lok Sabha.
Ka jingjied ne ka jingleit thep ‘vote’ kan long ha ka Sngi Thohdieng ka 19 tarik mynta u bnai. Ha kane ka kynti ki don haduh 6 ngut ki kyrtong ki ban aireng na ka Shillong Parliamentary Constituency, kata u Bah Vincent H Pala kyrtong ka Congress, Kong Ampareen Lyngdoh kyrtong ka NPP, Bah Robertjune Kharjahrin kyrtong ka RDA, Dr Ricky A.J Syngkon kyrtong ka VPP kynthup ar ngut ki kyrtong shimet, kata u Prof. Lakhon Kma bad u Bah Peter Shallam.
Katba na Tura Parliamentary Constituency ki don 4 ngut ki kyrtong ki ban ïakhun bad kine ki kynthup ïa ka Agatha K Sangma kyrtong ka NPP, Saleng Sangma kyrtong ka Congress, Zenith M Sangma kyrtong ka TMC bad u kyrtong shimet u Labenn Ch. Marak.
Ha kane ka sngi pynkut ïa ka jingïalap ilekshon, la ïoh ban sakhi ba ki kyrtong ryngkat ki nongïalam kiba dei na ki seng saiñ pyrthei bapher-bapher ki la hiar sha ki jaka ba la buh ban pynlong ïa ka jingïalang na ka bynta ban pynsngew sha ki paidbah nongshong shnong ïa la ki jong ki mat bad ki nongrim ba ki don ha kane ka ilekshon bad kumjuh ruh ban khlei ïa ki kular bapher-bapher ba kin pynurlong lada ki ïoh ïa ka jingjop.
Kane ka sngi ïalap ilekshon kaba khatduh ka la long ruh kaba shongshit namar ki paidbah nongkyrshan jong ki seng saiñ pyrthei bapher-bapher ki la mih na la ki ïing ki sem ban leit pyndap ïa ki jaka pynlong jingïalang bad ban sngap bad shah shkor ruh ïa kaei kaba kum ki kyrtong bad ka seng kaba ki mihkhmat ki don ban pynshai.
La ong ruh ba na ka liang ki kyrtong ryngkat ki nongïalam seng ki la pyni sha ki paidbah ïa la ki nia ki jutang kaba ki don, ki jingkular ba ki la ai bad ka jingbuh jingkyrpad ruh sha ki paidbah ba kin jied ïa ki kyrtong ki jong ki.
Hadien ba kut ka jingïalap ilekshon, mynta kan sa wan sa ka pali jong 22,17,100 ngut ban ai pat ïa ka rai ka jong ki ha ka 19 tarik kaba dei ruh ka sngi thep ‘vote’ ba ïano kin phah sha Delhi ban long u nongmihkhmat na ka bynta 5 snem.
