Shillong, Ïaïong 17
Ka jingïalap ilekshon na bynta ka MP sha ka ïingdorbar Lok Sabha na Shillong konstitwensi ka la kut noh mynta ka Sngi Balang ha ka por 4 baje janmiet. Hynrei napdeng ki nongïalap ilekshon ïa ki 6 ngut ngut ki kyrtong, ki paidbah ki kham peit bad sngap bha ïa ka jingkren u Bah Prestone Tynsong, uba dei u Sym-bud Myntri Rangbah bad President ka National People’s Party (NPP) ha jylla, bad u Bah Ardent Basaïawmoit, u MLA ka Nongkrem bad President ka Voice of the People’s Party (VPP).
Wat la ha kine ki sngi bad bnai ba la leit, ha ka jingïalap ilekshon ka don beit ka jingkawang ktieh hapdeng ki nongïalam na ki seng saiñpyrthei bapher-bapher. Pynban ka jingkawang ktieh kaba jur bad mih ha man ki jingïalang ka long beit hapdeng kine ar ngut ki nongïalam.
Ka jingpyni ïa la ki nia ki jutang hapdeng kine ar ngut ki nongïalam ka la pynlong ïa ki paidbah ban sngewtynnad ban sngap ïa ka jingkren jong ki ha ‘YouTube’.
Kumjuh ruh ngi lah ban sakhi ba ki paidbah ki kham wan tuid sha ki jingïalang lada ïoh jingtip ba kine ar ngut ki nongïalam ki wan ban ai jingkren.
Haba phai sha ka jingïalang VPP la sakhi ruh mar shu ïeng kren u Bah Ardent la ïohi ba ki paidbah ki la risa, kumjuh ruh ha jingïalang ka NPP mar shu ïeng kren u Bah Prestone ki paidbah ki la risa beit.
Kaba kham sngewtynnad shuh shuh ha kane ka jingïalap ilekshon ka long ba ki paidbah ki duhoi bad risa lada kine ar ngut ki la pynïap nia mar kylliang.
Wat la ki kyrtong ryngkat ki nongkitkam ki la dep ban pynshai sha ki paidbah ïa ki nongrim ba ki ïeng, hynrei ka rai kaba khatduh ba kin ai kan dei beit ha ka 19 tarik u Ïaïong.
Kum ban shu kdew ki kyrtong kiba ki paidbah kin sa rai ha ka 19 tarik u Ïaïong ki long ka Kong Ampareen Lyngdoh na NPP, Dr. Ricky A.J Syngkon na ka VPP, Bah Robertjune Kharjahrin na ka UDP, u Bah Vincent Pala na ka Congress, u Prof. Lakhon Kma bad u Bah Peter Shallam kum ki kyrtong shimet.
