Shillong, Ïaïong 17
U Returning Officer (RO) ka 1-Shillong (ST) Parliamentary konstitwensi u la pynmih ïa katto-katne ki jingpyrkhing haba ïadei bad ka ilekshon ban wan sha ka Lok Sabha.
“Kane ka dei na bynta ka jingpyntip bad ka jingbud ryntih jong baroh ki kyrtong ba ïakhun ilekshon bad ki President/Secretary jong baroh ki seng saiñ pyrthei jong ka 1-Shillong (ST) Parliamentary konstitwensi haba ïadei bad ka ilekshon sha ka Lok Sabha ba katkum ka Standard Operating Procedure (SOP) na bynta ki khatduh 72 kynta haduh ba kut ka jingthep ‘vote’, baroh ki nongkitkam jong ki seng saiñ pyrthei la ki dei shimet ne jingwan jngoh ‘Official’, la khang ban pyndonkam ïa ki kali ‘Pilot’, ki kali ba don khlieh lait rong bad ki kali ba pyndait ‘siren’,” la ong u RO ha ka kyrwoh.
Haba ïadei bad ki ‘Convoy’, yn ym shah ïa ki kali kiba synran palat 10 tylli, lait noh ki kali pahara.
Ha kajuh ka por, yn ym shah ïa ka jingïaid ‘rally’ ki thuk-thuk ha kano-kano ka jaka ha ka por ilekshon.
Kano-kano ka jingpynkheiñ yn leh da kaba tyngeh katkum ki kyndon jong ka aiñ.
