Shillong, Ïaïong:
Namar ka ilekshon ban wan sha ka Lok Sabha bad da kaba buh jingmut ïa ka jingwan tuid ki kali kiba la bynshet kam na bynta ka ilekshon sha ka jaka pynïeng kali kaba ha SRGT & JN Stadium, Polo na bynta ban aiti ïa ki kor EVM hadien ba la kut noh ka ilekshon na man la ki jaka thep ‘vote’, ka tnad pulit kan pyntreikam ïa ka rukom pynïaid kali thymmai ha ka 19 tarik mynta u bnai naduh 5:30 baje janmiet.
Yn ym shah ïaid kali na lad Mawroh (Tri-Jn) sha lad Golf (Tri-Jn) katba yn phah ïaid noh ïa ki kali sha FCI-Lawmali-Polo. Ha kajuh ka por, ym shah ïaid kali na lad Tiara Restaurant sha lad Golf (Tri-Jn) bad ki kali kin hap ban ïaid noh sha Pynthorumkhrah.
Yn ym shah ïaid kali ruh na Golf Club sha Polo bad yn phah ïaid noh sha lad Golf (Tri-Jn), Mawroh/Shyiap.
Ha kajuh ka por, yn ym shah ïaid kali na lad Lumjingshai sha CRPF bad yn phah ïaid noh sha Lawmali-Polo. Kumjuh, yn ym shah ïaid kali na lad Lumjingshai sha Forest Colony bad ki kali kin hap ïaid noh sha Lawmali-Polo.
Na ka liang ka tnad ka la khang ruh ïa ki kali ban ïaid na 4th Furlong sha Polo bad ki kali kin hap ïaid noh sha lad CS. Yn ym shah ïa ki kali kiba wan na lad Lawmali ban khun sha kamon na lad Polo bad kin hap ïaid noh sha lad Green Hills.
Ki kali kiba wan na lad Green Hills kin ym lah ban khun sha kamon na lad Matri Mandir bad kin hap ïaid sha 4th Furlong.
Nalor kine, la kyrpad ïa ki kali heh ban ym ïaid ha ka thaiñ Polo naduh ka 17 haduh ka 19 tarik mynta u bnai.
La kyrpad ruh ïa ki paidbah ban kiar na kaba ïaid sha ka thaiñ Polo naduh 5 baje janmiet ha ka 19 tarik mynta u bnai.
Shuh shuh ka tnad ka kyrpad ïa ki paidbah ban ym pynïeng kali ha ka thaiñ Polo naba yn ym shah ïeng kali ha katei ka thaiñ ha ka 18 bad 19 tarik mynta u bnai.
Hynrei kine ki jingpyrkhing kin ym treikam ïa ki kali ka tnad ‘Emergency Services’.
Kane ka long katkum ka kyrwoh na u SP ka East Khasi Hills, u Rituraj Ravi (IPS).
