Shillong, Ïaïong 17
Namar ka sngi thep ‘vote’ ka la jan, ki briew Sorkar kiba dei ban leit pynlong ïa ka ilekshon ki la mih ban leit sha la ki jong ki jaka thep ‘vote’ ha baroh ar tylli ki konstitwensi ka Shillong bad Tura Lok Sabha konstitwensi.
Ki briew kiba dei ban pynïaid ïa ka jingthep ‘vote’ ha ki jaka thep ‘vote’ kiba hap ha Shillong Parliamentary konstitwensi, ki la mih kumba 244 kynhun ban leit sha la ki jong ki jaka ba kham jngai ha kaba ki don ruh ki kynhun kiba shah bynshet ban leit sha ki jaka ba dang hap ïaid kjat bad shong da ka lieng ban kam ïa ki wah na shiliang sha shiliang.
U Chief Electoral Officer (CEO), u Dr. BDR Tiwari u la ong ba ki don ruh 518 kynhun ki briew Sorkar kiba shah bynshet ban leit pynlong ïa ka jingthep ‘vote’ ki la mih ban leit sha ki jaka thep ‘vote’ kiba hap ha Tura Parliamentary konstitwensi.
Haba kylli katno tylli ki don ki jaka thep ‘vote’ kiba dang hap ïaid kjat namar ym pat poi surok bad ki jaka ba hap shong da ka lieng, u CEO u la ong ba ki don kumba 50 tylli kum kita ki jaka thep ha ka Jylla.
U la ong ba ki kynhun kiba dei ban leit sha kine ki jaka kiba kham saja, ki la mih lypa naduh ka 16 tarik ban leit sha ki jaka thep ‘vote’.
U la ong ba ka jingeh ban leit sha kine ki jaka thep ka dei ruh namar ka jinglong ka suiñbneng khamtam lada slap.
Baroh ki jaka thep ‘vote’ ha Shillong Parliamentary konstitwensi ki don 2,288 tylli bad ha Tura konstitwensi ki don 1,224 tylli ki jaka thep ‘vote’.
Baroh ki jaka thep ‘vote’ ki don 3,512 tylli ha baroh ar tylli ki Lok sabha konstitwensi jong ka Jylla.
Ka jingthep ‘vote’ ha Shillong bad Tura kan long ha ka wat kaba nyngkong jong ka ilekshon kata, ha ka 19 tarik mynta u bnai.
Ki don ruh ki pulit pahara kiba synran lang ïa ki nongpynïaid ïa ka ilekshon kiba dei ban pahara ha kylleng ki jaka thep ‘vote’.
