Shillong, Ïaïong 17
Ka jingïalap ilekshon jong ki seng saiñ pyrthei bapher-bapher na ka bynta ka ilekshon Lok Sabha ka la kut noh ha ka por 4 baje janmiet jong ka Sngi Balang. Kane ka long ruh 48 kynta shwa ban poi sha ka sngi thep ‘vote’ ka ban long ha ka 19 tarik mynta u bnai.
“Ki kynta ba jar jar ne kata ka Silence Period ka la treikam pura naduh ka por 4 baje janmiet jong ka Sngi Balang,” la pyntip u Chief Electoral Officer (CEO) ka Meghalaya u Dr. B.D.R Tiwari haba kren sha ki lad pathai khubor hadien ka jingleit jurip ïa ka Electronic Media Monitoring Cell ha ka shlem treikam DIPR.
“Hadien ba la treikam pura ki kynta ba jar-jar, ki seng saiñ pyrthei kim lah shuh ban pynlong ïa kino-kino ki jingïalap ilekshon ne ‘rally’ lait noh tang ka jingleit rung sha ki thliew ïing ban ïakynduh ïa ki briew,” la ong u CEO bad bynrap ba ka jingïakren para marwei kan don hynrei ym lah pat ban pynlong ïa kino-kino ki kynja jingïalang na ki seng saiñ pyrthei ha kine ki kynta ba jar-jar.
Ha kawei pat ka liang, u CEO u la pyntip ba ka Election Commission ka la ïoh ban pdiang palat 60 tylli ki jingujor halor ka jingkynnoh jong ka jingdon ka jingpynkheiñ ïa ka Model Code of Conduct (MCC) lyngba ka C-Vigil bad kiwei kiwei.
“Halor kine ki jingujor, ngi la shimkhia bad ngi la pan ïa ka kaiphod, ki don ki kam kiba ngi la tohkit bad bun ngi la lap ba ki khlem pynkheiñ ïa ki kyndon ka MCC kumba la kynnoh,” la ong u CEO.
Ha kajuh ka por, u CEO u pyntip ba haduh 4700 ngut ki briew ki la jied ban thep ‘vote’ na la ïing.
