Shillong, Ïaïong:
U President ka Hynñiewtrep Integrated Territorial Organisation (HITO), Bah Donbok Dkhar u la kyrpad ïa ki paidbah nongshong shnong jong ka Bri U Hynñiewtrep khamtam ïa ki paradoh-parasnam ba ki dei ban mih paidbah ha ka 19 tarik u Ïaïong ban leit thep ïa ka ‘vote’ jong ki namar ba ha ka Ri synshar paidbah lada ki paidbah ki heh tang ka nia ha ki rynsan ‘social media’, kan nym ïalam ïa ki shano-shano ruh.
U Bah Donbok u la ong ba lada ki paidbah kim thep ïa ka ‘vote’ jong ki, kim don hok ban dawa ïa ka hok ne ban mih sha surok ban dawa ïa kaei-kaei. Kumta na ka liang jong ka seng ruh ka ai ka kti kamon bad ka kti kadiang bad ka Election Commission of India (ECI) da kaba kyntu ïa ki para dkhot jong ka seng ba kin leit ban pynsngewthuh ïa ki paidbah ba ki dei ban mih ha ka 19 tarik u Ïaïong 2024 kaba dei ka sngi thep ‘vote’ khnang ba kane ka jingsynshar paidbah kan im hapoh ka Bri U Hynñiewtrep.
“Kane kan dei ka khubor kaba shai bha, lada ngim thep ‘vote’ ka pyni ba ka synshar paidbah kan sa ïap noh, lada ngi pyni pat ba hangne ngi ïoh 100% ka jingthep ‘vote’ kaba mut ka sorkar India ka hap ban peit bad ka hap ban sngap ïa ki jingdawa jong ngi, baroh shikatta na ka liang jong ngi ki paidbah, ngim da kham mih ha ka por MP ilekshon ban leit thep ‘vote’ bad kiba bun ki sngewbang tang ha ka MLA ilekshon hynrei ka MP ilekshon ka dei kaba kongsan tam namar ba ka dei kata ka sorkar kmie”, la ong u Bah Donbok.
U la ong ba ka MP ilekshon ka long ka ilekshon kaba donkam tam, bad kumta ka long kaba donkam ban phah da ki nongïalam bad ka jingthmu jong ka seng ka long ban pynïoh ïa ka 100% ka jingthep ‘vote’.
Shuh shuh u Bah Donbok u la ong ba ka seng kam kyntu ïa ki paidbah ba kin thep ïa ino-ino kyrtong, hynrei kum ka seng ka kyntu ïa ki paidbah ba kim dei ban shah thied ha ino-ino ban thied ïa ka hok jong ki.
“Ngi kum ka seng ngi kyntu ïa ki paidbah ki dei ban mih shakhmat ban thep ïa la ka jong ka hok bad wat nym shah ïa kino-kino ki briew ba kin thep ïa ka hok jong ki da kaba leh tuh da kano-kano ka rukom”, la ong u Bah Donbok.
U la ong ba ka seng HITO ka ïeng na ka bynta ka jinglaitluid bad ka hok ka jingshakri na ka bynta u paidbah.
U la ong ba ha shwa ban dawa ïa ka Inner Line Permit (ILP) bad ka jingpynrung ïa ka ktien Khasi ha ka khyrnit baphra jong ka riti synshar ka Ri, kum ki paradoh parasnam ka Bri U Hynñiewtrep ki dei ban don ka jingïatylli ban mih ryntih ha ka sngi thep ‘vote’ ban pyndonkam hok ïa ka bor kaba ki don bad ban phah da ki nongmihkhmat kiba lah ban kren na ka bynta ki paidbah ka jylla Meghalaya ha ki 5 snem ban wan.
“Sngewbha ban mih ban pyni ïa ka jingïatylli bad ban pyni ïa kaei kata ka jingieid Jaitbynriew. Ka jingïatylli ka dei lada ngi mih ka mut ngi don ïa ka jingïatylli hynrei lada ka dang tam hi ka ‘vote’ jong ki nongwei ban ïa ngi, ka sorkar kmie kan peit halor kane”, la ong u Bah Donbok.
