Shillong, Ïaïong 17
Ha kawei ka jingjia shah pynïap ha Rilum Garo, ki pulit ka East Garo Hills district ki la lap lai tylli ki met ïap kiba la shah thang bad la tep ha kawei ka khlaw kaba don ha ka shnong Rogu Alda kaba hap ha Thanat Rongjeng, East Garo Hills district bad ïa kali kaba la shah wiang ding bad ka met jong kine ki lai ngut la tep hajan kata ka kali kaba shah thang.
Na ka jingtohkit ki pulit, ki la lap ksai ba kane ka jingjia ka dei ka jingïakynad hapdeng ka kynhun ki nongtuh kali bad ki nongkhaïi masi tuh.
La ong ba kane ka khlaw ba lap ïa ki met ïap ba shah tep ka jngai kumba 1.5 km na ka surokbah NH-217 kaba pynïasoh ïa ka Dudhnoi-Damra-Rongjeng-Baghmara.
Ha u kyrwoh khubor ha ka Sngi Balang, lyngba u Superintendent of Police (SP) ka East Garo Hills district u Bah S.A Rynjah, la ïathuh ba ki pulit ki la ïoh jingtip nyngkong na ki bahaïing jong uwei na kiba la khlad ha ka 16 tarik Ïaïong 2024 uba la tip kyrteng kum u Jamor Ali (35 snem ka rta), ki la pyntip ba u Jamor Ali u la mih na ïing ha ryngkat u nongñiah jong u uba la tip kyrteng kum u Noor Ahmed bad u Zahidul Islam (25 snem ka rta) ha ka janmiet 15 tarik Ïaïong 2024 ban leit sha Meghalaya na ka bynta ka kam kaba la don ba ïakut bad ki.
Katba ha ka 16 tarik Ïaïong 2024 ha ka por 6 shiteng baje ki bahaïing bahasem ki la ïoh ïa ka phone na u Jamor Ali uba la pyntip ba ki dang ïa bam ja step ha kawei ka khlaw kaba don ha Garo Hills. Hynrei kham hadien, ka mobile phone jong kine ki briew ka la lip bad ki bahaïing bahasem kim shym la ïoh shuh ban ïakren bad ki.
Ynda ki pulit ki la pynlong ka jingtohkit, la lap ba ka kali kaba pyndonkam da kine ki briew ka la ingkhong bad haba pyrshang ban wad bniah ha ki jaka ba marjan, la lap ïa kawei ka thliew kaba la tih ha syndah ba ïeng kata ka kali.
La ong ba ka kali kaba la jah, la lap na kawei ka khlaw kaba don hajan ka shnong Rogu Alda kaba hap hapoh ka Rongjeng PS, East Garo Hills District, kaba jngai kumba 1.5 km na ka surokbah NH-217 kaba pynïasoh ïa ka Dudhnoi – Damra – Rongjeng – Baghmara.
Ki pulit na ka kynhun wad bniah kiba kynthup na ka Forensic Laboratory (FSL) bad ka Crime Scene Unit (CSU), ki la pynlong ïa ka jingtohkit ha ka jingïadonlang U Executive Magistrate bad na kata ka khyndew ba la dep tih, la ïoh ban sei 3 tylli ki met ïap bad hadien la phah rah sha ka jaka ai jingsumar na ka bynta ban pyndep ïa ka Post Mortem bad hadien kata la aiti sha ki bahaïing bahasem na ka bynta ban pyndep ïa ka leh niam leh rukom kaba khatduh.
Lah ban ong ba u Zahidul Islam u dei u briew uba ju ïadonkti ha kaban tuh kali ha kaba ka jingujor ruh ka dang don hapoh Dudhnoi bad Krishnai bad ka dang don sa kawei ruh NBWA kaba dang sahteng pyrshah ïa u kaba hapoh ka thanat Krishnai. La ong ba u Jamor Ali u dei uba ju ïadonkti ha kaban shalan tuh ïa ki masi bad uba la shah pynngat mukotduma hapoh Thanat Matia ha Assam.
Ha kaba ïadei bad kane ka jingjia na ka liang ki pulit ki la pynngat mukotduma hapoh Rongjeng PS bad ka jingtohkit ka dang ïaid shakhmat.
