Shillong, Ïaïong 17
Ka lympung ïalehkai Maitshaphrang Khasi League Basketball 2024 ba la pynïaid da ka Khasi Students’ Union (KSU) ka la jan poi artad sha kaba kut ha kaba ki kynhun ïalehkai jong ki shynrang bad kynthei kin ïaknieh ïa ka nam lahduh ha ka Sngi Palei.
Ki kynhun kiba la rung sha ka final ha ka liang ki kynthei ki long ka Dubakh ‘B’ bad ka Dubakh ‘A’, katba ha ka liang ki shynrang ki long ka Dubakh ‘A’ bad ka ONXY.
Ha ka jingïakhun semi final ki kynthei kaba la long ha ka sngi Balang ha madan basketball jong ka Mawlai Nongpdeng, ka Dubakh ‘B’ ka la pynliem noh ïa ka Mawkasiang Marvels da 56-23 point bad ïa ka nam Player of the Match la ïoh da Ibahun. Ka Dubakh ‘A’ ka la pynliem noh ïa ka Dubakh ‘C’ 45-15 point bad ïa ka nam Player of the Match la khur da ka Ibashisha Lyngdoh.
Haba phai sha ka jingïakhun semi final jong ki shynrang, ka Dubakh ‘A’ ka la pynliem noh ïa ka FKJGP da 56-37 point bad ïa ka nam Player of the Match la khur da u Nathaniel Kharbhih. Ka ONXYka la jop da 64-50 point ia ka SYM bad ïa ka nam Player of the Match la khur da u Meban Shadap.
Ïa kane ka lympung yn wan ban pynhap pyrda da u President ka seng KSU Sengkmie u Bah Lambokstar-well Marngar kum u kongsan bad u Secretary ka Meghalaya Basketball Association u Bah Donald Wahlang kum u kongsan kyrpang.
