Shillong, Ïaïong 17
U President ka UDP, East Khasi Hills District, Bah Titos Chyne uba dei ruh u nongïalam ka Liang Pyrshah ha Khasi Hills Autonomous District Council (KHADC) u la kyntu ïa ki nongïalam ka UDP sengkmie ba kim donkam shuh ban ai kano-kano ka jingpynshitom ïa u Bah Lambor Malngiang namar u la dep rung sha ka NPP.
U Bah Titos u la ïathuh ba ha ki snem ba la dep, ki MDC ka UDP ki la dep phah jingthoh sha ka UDP sengkmie ban pynshitom ïa u Bah Lambor uba la leit kyrshan ïa ka EC ba la ïalam da ka NPP ha KHADC hynrei kim shym la pynshitom namar u dang kam ba u dei u dkhot ka UDP.
U la ïathuh ba ha kine ki sngi haba ka UDP ka khot ban ïakren, u aidaw ba um lait namar u bun kam. Hynrei da ka jingkiew rynsan ban leit ai jingkyrshan ïa ka Kong Ampareen Lyngdoh kaba dei kyrtong ka NPP ha ka jingïalang ha Smit ha ka 16 tarik Ïaïong, kane ka la paw shai ba u la dep mih lypa na ka seng UDP.
Shuh shuh u Bah Titos u la ong ba ka jingmih u Bah Lambor kan nym ktah ïa ka seng UDP, hynrei kan buh jingeh ïa u ha kine ki sngi ban wan.
U la ong ba ka jingwan pynïasoh u Bah Lambor sha ka UDP ban ïakhun ïa ka ilekshon MLA ha u 2023, ka dei ka jingmyntoi shimet jong u namar um kwah ban pynkhlaiñ ïa ka UDP.
Kum ban shu pynkynmaw, ka UDP kam shym la ai tiket ïa u Bah Bindo Lanong uba dei u nongïalam ka seng ha u 2023, namar ïa ka tiket la ai sha u Bah Lambor uba dei u MLA ka Nongkrem konstitwensi. Pynban kine baroh ar ngut (Bah Lambor bad Bah Bindo) haba kim poi sha ka thong ki la leit ban kyrshan ïa ka NPP ha KHADC.
