Mumbai, ïaïong:
U President jong ka seng AIMIM u Asaduddin Owaisi u la rai ban ai ka jingkyrshan na ka bynta u nongïalam jong ka seng Vanchit Bahujan Aghadi (VBA) u Prakash Ambedkar u ban ïakhun ïa ka ilekshon Lok Sabha 2024 na Akola konstitwensi ha Maharashtra, la ïathuh ka tyllong khubor.
Kumba la ïathuh la ong ba ka seng All India Majlis-E-Ittehadul Muslimeen (AIMIM) bad ka seng VBA ki la ïai pynskhem na ka bynta ban ïatreilang ha ka ilekshon Lok Sabha 2019 hynrei ka jingïatreilang ka la dkut noh ha ka por ba don ka ilekshon Assembly ha Maharashtra kaba la long ha utei u snem.
“Ngi ngeit ba ka kynhun nongïalam jong ki Dalit ka la dei ban wan. Nga buh ka jingkyrpad ïa ka kynhun jong ka seng AIMIM na Akola ba kin ai ka jingkyrshan na ka bynta u Prakash Ambedkar,” la ong u Owaisi ha ka Sngi Ba-ar kumba la ïathuh da ka tyllong khubor.
U Prakash Ambedkar u dei u khun ksiew jong u Dr B R Ambedkar. Ka seng AIMIM kan sa ïakhun ïa ka ilekshon Lok Sabha ban wan na Pune, u Owaisi u la ong bad rai halor ka jinglong kyrtong jong u Anis Sundke.
U Owaisi u la pyrshang ruh ban phai halor ka jingkren jong u nongïaleh ban pynïoh ïa ka hok jong ki Maratha u Manoj Jarange, uba la ong, “U Briew uba raikhoh u lah ban pynkhynñiuh ïa ka sorkar jylla. Nga don ka jingkyrmen ba u Jarange un sa thaw ïa ka seng saiñ pyrthei. Namar ba ki bor ka aiñ kin treikam tang lada lah ban thaw seng saiñ pyrthei bad jop ha ki ilekshon”, la ïathuh shuh shuh ka tyllong khubor.
U Owaisi u la pynshisha da kaba ong ba baroh ki seng saiñ pyrthei ki long pyshah ïa u dkhot jong ka seng AIMIM ha Lok Sabha ka Aurangabad u Imtiaz Jaleel ha ka ilekshon.
