Nongstoiñ, Ïaïong:
U District Magistrate (DM) ka West Khasi Hills, Bah Garod LSN Dykes, IAS, u la pynjari da ka kyndon aiñ 144 CrPC kaba khang pyrshah ïa baroh ki jingïalap ilekshon, ka jingïalum paidbah, pyndonkam ïa ki tynghung ba sawa jam, ka jingsam ïa ki kot lyngkdop, ka jingpynïeng ïa ki lama ki banner bad kiwei kiwei 200 meter na ki Polling Booth.
U District Magistrate u la ong ruh ba la khang pyrshah ïa ka jingplie ïa ki shlem treikam seng saiñ pyrthei 200 meter na ki polling booth, ban pynlong jingïalang paidbah ne proseshon, ban rah ïa ki tiar pynmynsaw, pynlong kino-kino ki jingpyntieng ïa ki nongthep ‘vote’ ne ki paidbah.
Nangta, ka jingïalum briew kaba palat ïa ka 5 ngut ha kajuh ka jaka, ka jingdon jong ki seng saiñ pyrthei ne nongkyrshan kiba nabar ka konstitwensi.
Na ka liang u District Magistrate u la ong ruh ba kane ka hukum kan treikam mardor ha baroh kawei ka District naduh ka 4 baje janmiet jong ka 17 tarik u Ïaïong, 2024 haduh ban da kut ka ilekshon.
