Imphal, ïaïong:
Ki shipai, ki la pynkhlaiñ ïa ka jingpahara ha Manipur hadien ba ki runar ki la siat ïa ki trok, kit umphniang bad kiwei pat, ha ka surok bah Imphal – Jiribam ha Manipur ha ka Sngi Ba-ar.
Kane ka jingjia ka la jia ha ka por 10.30 mynstep jong ka Sngi Ba-ar ha ki bynta jong ka NH 37, kaba don hapdeng ka Shanti Khunou bad ka Kaimai ha Tamenglong distrik, ka jaka kaba jngai kumba 160 km na Imphal, la ïathuh ki pulit.
Ki runar ki la siat ïa ki trok kit mar, kynthup ki trok kit umphniang kali bad LPG. U nongñiah jong kawei na kine ki kali, u Tularam Magar na ka shnong Irang Part-II kaba don ha Tamenglong, u la mynsaw na ka jingdei kuli ha ka kjat jong u bad mynta u dang don ha ka jaka ai jingsumar.
Ki pulit ki la ïathuh ba ïa u Magar la kit da ka liengsuiñ na Khongsang Helipad.
Ka sorkar Manipur ka la phah ïaid ïa kine ki kali kit mar bad umphniang nangne na ka bynta ka jingshngaiñ, hynrei ki la don tang kumba katto katne tylli kiba pyndonkam ban ïaid na NH-37 ha ki 10 bnai ba la leit naba la jia ka jingïakynad bajur ha ka jylla.
Ka jingtohkit ha kaba ïadei bad kane ka jingjia ka dang ïaid shakhmat ban ithuh bad ïohkem ïa ki runar kiba la donkti ha kane ka kam thombor, la ïathuh shuh shuh ki pulit.
Ha kaba ïadei bad kane, hadien ka jingjia, la sakhi ba kiba bun ki briew ki la leit ïeng laiñ hakhmat ki jaka sam umphniang kali, naba ki khuslai ba ïoh kim ïoh umphniang ïohba ïakhih ki nongñiah jong kine ki trok ban pyrshah halor kane ka jingjia, kane ka la long wat lada kam pat don kano kano ka jingpyntikna ban don kum kata ka jingïakhih, la ïathuh ka tyllong khubor.
