Nongpoh, Ïaïong 17
Kawei na ki skul kaba la paw bha ha ka thaiñ Ri Bhoi, ka Ri Bhoi Presbyterian Higher Secondary School ha ka sngi Balang ka la pynhap pyrda noh ïa ka lympung ïalehkai Inter House Athletic Sports Meet 2024 ha ka madan NSCA, Pahamsyiem.
Ïa kane ka lympung ba ai rynsan ïa ki khynnah skul ba kin pyni ïa la ki sap ki phong ha ki kam ïalehkai bapher bapher nalor ka jingpule jongki, la sdang naduh ka 12 tarik mynta u bnai bad la phiah ha ki ïing lane ki house kiba la jer kyrteng lyngba ki rong bapher bapher.
Ka District School Education Officer (DS-EO) jong ka Ri Bhoi District, ka Kong Paidalyne Lyngdoh Nong -lait, ka la wan ban shim ïa ka bynta kum ka kong-san ha ka jingïadon ryng-kat lang u Babu W. Radu, Principal jong ka skul, u Rev. B.B. Mar-khap, Executive Secre-tary ka RBP Synod, u Rev D.R. Suting, Secretary ka Managing Committee jong ka skul lem bad kiwei kiwei de nalor ki nonghikai bad ki khynnah skul.
Kum ban shu kdew hangne, ha kine ki saw sngi lynter, ka skul ka la ïoh ban pyndep ïa ki jingïalehkai bapher bapher kiba kynthup naduh ka Javelin Throw, Shot Put, Discus Throw, High Jump, Long Jump, ki jingïakop mareh ha ki jingjngai ba 100 mitar, 200 mitar, 400 mitar bad ruh kaba 3000 mitar nalor ka Relay Race, ka Midley Relay Race bad kiwei kiwei de.
Ka Kong Paidalyne Lyngdoh Nonglait haba kren ha kane ka sngi ka la ong ba nalor ka jingpule, ka jingïashim bynta ha ki jinglehkai bapher bapher ka dei kaba kongsan ha ka jingim ka jong ngi ban saiñdur bad tei ïa ka jingmut jingpyrkhat, ban ïoh ia ka met kaba shait ba khlaiñ bad ka jinglong mynsiem kaba sngur.
Ka la ong ruh ba ka jingïashim bynta ha ki jingïalehkai ka ïarap ïa ki khynnah skul ba kin long kiba pynkhreh ban ïakhun ïa kino kino ki jingeh kiba wan ha ka jingim ka jong ki bad kan ïarap ruh ba kin pynïar ïa ka pyrkhat pyrdaiñ ban long ki briew kiba don ïa ka jingkitkhlieh ha ka imlang ka sahlang lashai la shisngi kam pher lada ki rem ne ki jop, hynrei ka jingïashim bynta ka jong ki hi ka la dei lypa ka jingjop.
Shuh shuh ka la ai mynsiem bad pynshlur ruh ïa ki khynnah skul ba ki dei mih shakhmat ban ïashim bynta ha ki jingïalehkai bapher bapher la ka dei ka jingïalehkai phutbol, ka jingïamareh thong ne kiwei kiwei ki jait jingïalehkai khnang ba kin ïoh ïa ka met kaba shait kaba khlaiñ, ka jingmut jingpyrkhat kaba shai bad ruh ba kin ïohthiah bha ha ka por miet.
Haba pynkut pat ïa kane ka sngi, na ka liang ki bor pynïaid jong ka skul, ka la ïoh ruh ban sam ïa ki khusnam ia ki nongjop ha ki jingïakhun shimet kiba pher bapher katba ïa ka nam lahduh napdeng jong baroh ki house, la ïoh da ka Blue House bad ïa ka nam Best Discipline pat la rah da ka Violet House.
