Agartala, ïaïong:
Ka General Secretary jong ka seng Congress ka Priyanka Gandhi Vadra ha ka Sngi Ba-ar ka la pynlong ïa ka jingïalap ilekshon kum shi bynta ban ai jingkyrshan ïa u kyrtong jong ka seng u ban ïakhun ïa ka ilekshon Lok Sabha ha Tripura West u Asish Kumar Saha bad ïa u kyrtong jong ka kynhun synrop INDIA u ban ïakhun na ka bynta ka Ramnagar Assembly ha ka ilekshon shiteng samoi u Ratan Das ha Agartala.
Da ki hajar ngut ki nongkyrshan jong ka seng Congress ki la ïashim bynta ha ka jingïalap ilekshon ha ki surok, ha kaba la ïohi ïa kiba bun ba ki la rah ïa ka lama jong ka seng Congress. Ïa kane ka jingïalap ilekshon la pynkut noh ha khmat ka Congress Bhavan kaba don ha Paradise Chowmuhani, Agartala, hadien ba la dep ban ïaid ha kylleng ki bynta jong ka nongbah.
