New York, Iaïong:
Katkum ki khubor, la ong ba ki jingjia thombor bad ki jingiakynad ki la jur bha hapoh US katba nang mih ki sngi bad ha katei ka jingjia la ong ba uwei u heh pulit ka Sheriff u la shah siat iap hapoh ka shnong Salina jong ka nongbah New York ha ka Sngi U Blei.
La suba ba utei u nongsiat ruh u la khlad lang ha katei hi ka jingjia bad ka jingia aireng markylliang, kaba la jia ha kawei ka iing ha ki thaiñ jong ka Darien Drive ha ka por kumba 8:15 jong katei ka miet Sngi U Blei.
Ka Salina ka dei ka shnong hapoh ka dong Onondaga County jong ka United States.
La ong ba kitei ki heh pulit ki dang leit ban wad bniah bad ban bud-dien halor ka jing ujor ba shah tuh kawei ka kali na Syracus, bad kaba la pynlong ia ki ba kin leit rung sha katei ka iing ha kaba ki la shah siat pynban ha kitei kiba don ha katei ka jaka.
Haba iadei bad kane, na ka liang ka tnat pulit ka la phah ia ka khubor sngewlem sha ka iing ka sem jong kitei ki heh pulit kiba la duh noh ia ka jingim katba ki dang shakri bad trei hok ia ka kam ha katei ka sngi.
