New Delhi, ïaïong:
Ki la don kumba 29 ngut ki lehnoh Maoist kaba kynthup u heh nongïalam u Shankar Rao, ïa uba la shah thong ka khlieh jong u da T. 25 lak, ki la shah pynïap ha ka por ba la don ka jingïasiat kaba markylliang bad ki shipai ïada ri ha Kanker distrik jong ka Chhattisgarh ha ka por shiteng sngi jong ka Sngi Ba-ar.
Na kane ka jingjia, la ïoh ban kurup ïa shibun ki tiar siat kynthup ki suloi AK-47 bad INSAS. Ki la don lai ngut ki shipai ïada ri kiba la don bynta ha ka jingïasiat, kaba la jia ha kawei ka khlaw kaba don hajan ka shnong Binagunda hadien ba ka kynhun ba la ïatreilang hapdeng ki District Reserve Guard bad ki Border Security Force ki la shah thombor.
Arngut na ki lai ngut ki shipai kiba la mynsaw ki dei na ka tnat shipai BSF. Kine mynta ki la kham ïoh bor hynrei uwei pat uba dei jong ka kynhun DRG u dang shitom jur.
Kine baroh lai ngut ki shipai ki dang shah sumar ha ka hospital kaba don ha kane ka thaiñ.
Kane ka jingjia ka la jia khyndiat sngi hadien ba ka ka sorkar kmie ka la hukum ïa ki pulit jong ka Chhattisgarh ba kin aiti noh ïa ka jingtohkit jong 17 tylli ki mukotduma kiba don ka jingïadei bad ka Left Wing Extremism sha ka kynhun NIA.
Ki ki mukotduma ki kynthup halor ki jingpynïap ïa ki shipai ïada ri bad ki riewpaidbah.
Ha u bnai Kyllalyngkot, u Myntri jong ka sorkar kmie uba dei khmih ïa ka tnat ki kam pohïing u Amit Shah u la pynlong ïa ka jingïalang halor ka Left Wing Extremism bad ki heh ki haiñ ha Raipur ha kaba u la ai jingmut bad ai mynsiem ïa ki ba ki la dei ban ïakhun ha ka ban pynkut noh ïa ka Left Wing Extremism ha ki lai snem ban wan.
Ka tyllong khubor ka la ïathuh ba ka kynhun NIA ha u snem ba la lah ka la ïakhun pyrshah ïa ka kynhun Popular Front of India (PFI) halor ka jingshah kynnoh donkti jong ka ha ki kam ba ïadei bad ki jingthong pisa halor ki kam pyntriem jong ki lehnoh.
“Ha ki katto katne snem ba la leit, ki la don shibun ki jingleit thwet lehnoh da ki shipai ka kynhun Central Armed Police Forces (CAPFs) ha Chhattisgarh, Bihar, Jharkhand, Maharashtra, Odisha bad ha ki katto katne ki thaiñ ba don kham sha kyndong jong ka Jharkhand bad Andhra Pradesh. Hynrei ka sorkar kmie ka la kwah ban nang bteng ïa ka jingtohkit bad hadien ka jingkylla jong ka sorkar, ka la bthah ba la dei ban aiti noh ïa kine ki mukotduma sha ka kynhun NIA,” la ïathuh ka tyllong khubor.
Ki 17 tylli ki jingjia kiba la mih ha kaba ïadei bad ki kam pyntriem jong ki lehnoh ka la long na Bijapur, Sukma bad Narayanpur jong ka thaiñ Bastar bad ar tylli ki distrik kiba don ha khappud kiba kynthup ïa ka Mohala Manpur bad ka Gariaband. Ïa kine baroh ki jingmudui la buh ha u snem 2023 bad 2024.
Na ki 17 tylli ki mukotduma, 8 tylli ki dei halor ki kam pynïap briew, kynthup ïa arngut ki nongbud jong ka seng BJP u Birjhu Taram bad u Ratan Dubey.
Ki la don 3 tylli ki mukotduma kiba long halor ka jingshah pynïap jong san ngut ki riewpaidbah, ha kaba la pynïap da ki lehnoh Maoist halor ka jingsuba ba ki dei ki nongrah khubor shaphang jong ki sha ki pulit.
Napdeng kine u dei u lehnoh Maoist barim uba la 27 snem ka rta ba la tip kyrteng kum u Kishan Kursam bad kum u Chotu, uba la shah pynïap ha u bnai Nohprah jong u snem ba la lah, khyndiat bnai hadien ba u la leit pyndem.
Lai tylli ki jingjia ki dei halor ka jingshah pynïap jong ki shipai ïada ri, kynthup ïa u shipai ka kynhun ITBP uba la ïap na ka jingbthei u bom IED ha Gariaband ha ka 17 tarik, Naiwieng bad lai tylli halor ka jingshah pynïap ki shipai ka kynhun CoBRA kiba la shah pynïap ha Tekulagudem ha u Kyllalyngkot jong une u snem.
Kumba la ïathuh ki heh ba dei khmih, la ong ba ki la don tang kumba 7 tylli ki mukotduma ïa kiba la aiti da ki pulit jong ka Chhattisgarh sha ka kynhun NIA naduh u snem 2019.
