Washington, Iaïong:
Ka United States ha ka Sngi Ba-ar ka la pynbna ba shen kan sa pynngat kyndon ia ka Iran haba iadei bad ka jingleit thombor jongka pyrshah ia ka Israel ha kane ka sien bad kumjuh ruh ka US ka la ong ba ka ngeit kiwei ruh ki paralok jongka kin bud ia ka rai jongka ban pynngat kyndon ia ka Iran namar kitei ki kam thombor jongka ha kane ka por.
La ong ruh ba katei ka jingpynbna na utei u National Security Advisor jong ka US- u Jake Sullivan ka long hadien ba ka Treasury Secretary jong ka US- ka Janet Yellen ka la pyntip ba ka US ka dang pyrkhat ia ki kam bad ki rai jongka haba iadei bad ka jingiakynad jong ka Iran bad Israel ha kane ka por.
Ka Iran ka la phah leit thombor palat 300 tylli ki ‘namding bad ki drone ha ka miet Sngi Saitjaiñ hadien ba ka la dep maham lypa ia ka Israel ba kan pynhiar kput ia kaei kaba ka Israel ka la leh haba iadei bad ka jingleit thombor jong ka Israel ia ka tnat ‘Embassy’ jong ka Iran kaba don hapoh ka nongbah Damascus jong ka Syria.
Kumta, la ong ba ka United States ha kine ki sngi ki ban wan kan sa shim ia ki rai ban pynngat ia ka Iran ha ki kyndon pynkheiñ aiñ bad ban pynkut ruh ia ki jingiadei kam bad katei ka ri namar ka jingleit thombor be-aiñ jong katei ka ri ia ka Israel.
Namarkata ruh ka US ka la ong ba ka ngeit skhem ruh ba ki paralok bad ki para marjan ri jongka kin leh ia kajuh kumba ka la lam khmat.
Shuh shuh ruh la ong ba ki bor pyniaid ka US kin pyndonkam da ki lad ka khaïi- pateng ban pynshitom ia ka Iran namar katei ka jingleh be-aiñ jongka ban leit thombor ia ka Israel ha ka Sngi Saitjaiñ jong kane ka taiew ba la leit.
