Ka jingïalap ilekshon MP Lok Sabha kaba shongshit tam ha ka Ri Khasi Jaiñtia ka la poi noh sha kaba kut ha ka por 4 baje janmiet jong ka 17 tarik Ïaïong, 2024. Ym pat ju don kaba kum kane ka ilekshon MP. Ki paidbah ruh ki la ïashim bynta da ka jingshongshit ha ki jingïalang jong ki kyrtong bad ki seng saiñpyrthei. Kan long shisha ka ilekshon ka ban sah kynmaw. Hynrei ngi dei ruh ban pynkynmaw ïa ki paidbah kiba la 18 snem shaneng ba tang ka jingkyrshan na la ïing kam pat biang. Hap ruh ban ïa mih sha ki jaka thep ‘vote’ ha ka 19 tarik Ïaïong, 2024 ban pyndep ïa la jong ka kamram bad ka hok ban jied ïano ngi sngewbit ban phah sha Lok Sabha ban long nongthaw aiñ.
Ki kyrtong, nongïalap ilekshon bad ki seng saiñpyrthei ki la pyndep ïa la ka jong ka bynta ban wan sha ki nongshong shnong ban pynsngew pynsngap ïa la ka nongrim, ki jubanlak bad ki nia ki jutang. Ka bynta jong ki, ka la kut noh bad mynta ka dei sa ka bynta jong ki nongthep ‘vote’ ban pyndep. Kumba ki nongthep ‘vote’ ki la ïashim bynta da ka jingshongshit bad jingshitrhem ka jingïalap ilekshon, ki dei ruh ban leit thep ïa la ka jong ka ‘vote’ kum kita ki nongshong shnong kiba don jingkitkhlieh. Wat shim ba ka jingthep ‘vote’ ka dei tang ka hok. Ngi dei ban kynmaw ba ka dei ruh ka kamram. Bunsien ngi lapmiet ban kylli tang halor ka hok katba ngi klet pat ïa la ki kamram kum ki paidbah jong kane ka Ri synshar paidbah. Ngi ïoh ïa kane ka kabu ban jied MP tang shisien ha ka san snem, bad lada ngi dang pynlehnohei ïa kata, ka mut kata ka jingsynshar paidbah ka sting bad lada ka sting, ngi buh ïalade hapdeng ka jingma.
Hei ho ïoh phi la ïa kum klet pat ïa ki kyrtong ha kane ka ilekshon! Ki kyrtong kiba la tyrwa ïalade ban long ki MP Lok Sabha na Shillong Parliamentary Constituency ki kynthup ïa u MP ba mynta, u Bah Vincent H Pala na ka seng Congress, ka Kong M Ampareen Lyngdoh na ka National People’s Party (NPP), u Dr Ricky Andrew J Syngkon na ka Voice of the People Party (VPP), u Bah Robertjune Kharjahrin na ka United Democratic Party (UDP) da ka jingkyrshan lang ka Hill State People’s Democratic Party (HSPDP), bad ki arngut ki kyrtong khlem seng lane ‘Independent’, u Dr Lakhon Kma bad u Bah Peter Shallam. Na Tura Parliamentary Constituency, ki nongïakhun ki kynthup ïa ka MP ba mynta, ka Agatha Kongkal Sangma na ka NPP, u Saleng A Sangma na ka Congress, u Zenith M Sangma na ka All India Trinamool Congress (AITC), bad u Labenn Ch. Marak kum u kyrtong khlem seng (Independent).
San snem mynshwa, na ka 1-Shillong Parliamentary Constituency, ki la don 11,97,806 ngut ki nongthep ‘vote’, bad na kine, 7,84,279 ki la ïashim bynta ban ‘vote’ katba na ka 2-Tura Parliamentary Constituency, na ka 7,16,990 ngut ki nongthep ‘vote’, 5,83,480 ngut ki la thep ‘vote’. Haba la kheiñ kyllum, ka jingwan thep ‘vote’ ha kato ka snem ha baroh artylli ki konstitwensi ka la poi sha ka 13,67,759 ngut na ki 19,14,796 ngut lane 71 na ka 100 (71 per cent). Hato ha kane ka sien ba mynta, ka jingwan ki nongthep ‘vote’ kan neh kumjuh lane kan hiar lane kan kiew? Ka jubab ka shong ha ki paidbah kiba la don ïa ka iktiar ban jied ïa ki MP. Lada ki kheiñ sting, khlem pep ka jingdon ki nongthep ‘vote’ kan hiar bad kin shu pynlehnohei noh ïa la ka jong ka hok bad kin hap ban ap biang hadien san snem ban jied MP. Ka jingthrang jong kiba bun ka long ban ïohi ïa ka jingwan bun bah ki nongthep ‘vote’ ha ka 19 tarik Ïaïong, 2024, bad ba kan don ka jingduna jong ki nongpynsyrwa kai ïa ka hok bad ka kamram jied nongthaw aiñ.
Ha ka ilekshon ha u snem 2019, na ka Shillong Parliamentary Constituency, u Bah Vincent H Pala na ka Congress, u la long u lahduh ha kaba u la tam da haduh 1,52,443 ‘vote’ ïa u kyrtong uba wan ba ar na ka seng United Democratic Party (UDP), u Bah Jemino Mawthoh, katba na Tura, ka Agatha K Sangma na ka NPP ka la jop bad ka la tam da 64,030 ‘vote’ ïa u kyrtong ka seng Congress uba la wan ba ar, u Dr Mukul M Sangma. Ha kato ka ilekshon, u kyrtong ka BJP na Shillong, u Bah Sanbor Shullai, u la ïoh kumba 75,790 ‘vote’ katba u Rikman G Momin na Tura, u la ïoh tang 31,384 ‘vote’.
Ym don ba lah ban pynbor ïano-ïano ba kin leit ne ym leit thep ‘vote’. Ka shong ha ka mon ba laitluid namar ka lynti ka kylluid. Lada dang hap ban shah pynbor, ngim pat long kiba bit ban jied ïa kita ki nongthaw aiñ. Ka por ka dang don ban pyrkhat thymmai na ka bynta kito kiba la rai ban ym leit thep ‘vote’ ha ka 19 tarik Ïaïong, 2024. Kylla thiah, kylla dem khnang ban ym ïa babe ynda la kut ka por ban thep ‘vote’. Wat ym ap ïa ki jingshah pynbiej namar kan long kum ka jingdie tad ïalade na ka bynta baroh san snem. Long kiba husiar, peitngor, shemphang. Pyndep ïa la ka hok bad ka kamram da ka jingkitkhlieh.
