Shillong, Ïaïong 17
U MDC barim ka Umsning, Bah Donkupar Sumer u la ujor ejahar pyrshah ïa u khlieh nongïalam ka Voice of the People Party (VPP), Bah Ardent Miller Basaïawmoit halor ka jingkynnoh donkti ban thied jaka ha ka por ba u dang long kum u Chief Executive Member (CEM) ka Khasi Hills Autonomous District Council (KHADC) ha u snem 2014.
“U Bah Ardent Miller Basaïawmoit u la leh ïa ka kam tuh, thok, bad kam be-aiñ haba ïadei bad ka jingpyndonkam pisa bakla haba u la long u CEM jong ka KHADC bad rong tuh ïa ka pisa paidbah ha ka dur jong ka jingthied jaka na bynta ka KHADC,” la ong u Bah Sumer ha ka ejahar ba la ujor ha thanat Lumdiengjri.
Haba pynkynmaw ïa ka jinglong Executive Member (EM) jong u ha katei ka por, u la ong, “Nga don ruh ki sabut kiba shai bad ba tikna ban pynshisha ïa kane, ïa kaba nga la bsut lang na bynta ka jingkhmih bniah.”
Ha kajuh ka por, u la kynnoh ba u Bah Basaïawmoit um shym la ïoh jingbit na ki EM jong ka KHADC ban ïaid shakhmat bad kano-kano ka ‘sale deed’ bad ym shym la pynrung kyrteng ïa ka (sale deed).
“U shu soi ïa ka kot ka bym treikam tang ban shu pyni ba la dep thied ïa ka jaka bad u la rong tuh T.35,25,039 na ki ‘account’ jong ka KHADC. Hadien, ngi la ïoh jingtip ba katei ka kot ka dei tang ka ‘Non-Judicial’ kaba T. 10. Ïa katei ka ‘sale deed’ ym shym la pynrung kyrteng bad ym shym la siew ruh ïa ka ‘stamp duty,” la ong u Bah Sumer.
Utei u MDC barim u la ong ruh ba katei ka kot kam treikam bad kam kit jingmut eiei hakhmat jong ka aiñ bad u (Ardent) la soi khlem ka jingïoh jingbit, hynrei tang ban ïoh rong tuh ïa ka pisa paidbah.
U la kdew ruh ba haduh mynta, ka KHADC kam shym pat lah ban kam trai halor katei ka jaka bad ka hap ban pyntreikam ïa ka ophis na i lyngkhot jaka ba la synñiang da ki trai jaka.
“Katei ka kam kaba la leh da uba shah kynnoh, Bah Ardent, ka la nang kham shai lyngba ka jingpynbna kaba 15.07.2022 ïa kaba ka KHADC ka la phah na bynta ka jingkhmih bniah – u trai jaka, Bah Nolipstar Lyngdoh ha ryngkat bad uba shah kynnoh, Bah Ardent, uba la kam ba u la ïaid shakhmat bad ka ‘sale deed’, u la pynsngew ba um shym la ïoh lut ïa ka pisa bad kumta um lah ban aiti ïa ka jinglong trai jong ka jaka. Kane ka paw shai ha ki minit jong ka jingïalang ka KHADC kaba la long ha ka 22.07.2022 (ïa kaba la bsut lang),” u la ong.
Shuh shuh, u la bynrap ba da la jingthmu sniew ban rong tuh (shuh) ïa ka pisa, u Bah Basaïawmoit u la weng kam ïa 7 ngut ki nongtrei da kaba ai daw ba ka KHADC kam don pisa bad hadien kane, u la thung pat ïa 12 ngut ki briew jong u.
“Kumta la kyrpad ïa phi ban leh ïa kaba donkam khnang ba uba shah kynnoh, Bah Ardent u nym lah ban ïaid laitlan hadien ba u la leh ïa katei ka kam tuh kaba khraw pyrshah ïa ka KHADC bad u paidbah ba bun balang,” la ong u Bah Sumer.
