Shillong, Ïaïong 17
Uwei u nongshong shnong na East Garo Hills u la thoh da ka shithi sha u Chief Electoral Officer ka jylla uba dei u babu sorkar ba heh duh ban peit ïa ka jingpynïaid ilekshon ha kaba u la ujor pyrshah ïa ki Deputy Commissioner bad Superintendent of Police ka North Garo Hills, West Garo Hills bad South Garo Hills da kaba kynnoh ba kine ki la ailad ïa ka jingïaid ka jingkhaïi tuh ïa ka shini sha Bangladesh bad ha kajuh ka por, ban ailad ïa ka jingïaid jong ki trok kiba kit palat pud kaba long ka jingpynkheiñ ïa ka hukum ka Supreme Court.
Ha ka shithi, u Nilberth Ch. Marak, kum uta u Social Activist, u la ong ba hadien ba u la dep thoh shithi ma u ba ka Election Commission of India ka la pynkynriah noh ïa u SP ka North Garo Hills, u Bruno A Sangma bad ha ka jaka jong u, la thung da u Abraham T Sangma. U la pynkynmaw ba ka jingujor ka jong u pyrshah ïa u Bruno bad u ophisar ka tnat Custom ha Gasuapara ka long halor ka jingailad ïa ka jingkhaïi be-aiñ ïa ki mar bam kum ka shini, piat bad kiwei sha Bangladesh khlem da donkam ban pyni ïa ki kot ki sla katkum ki aiñ.
Hynrei u la ong ba wat hadien ba la weng ïa u SP ka North Garo Hills, kam pat don ka jingsangeh ha ka jingkhaïi be-aiñ ïa ka shini sha Bangladesh bad kam don kano-kano ka jingshimkhia da ki bor distrik ka North Garo Hills lane South Garo Hills lane West Garo Hills ban teh lakam ïa kane ka kam be-aiñ. U Marak u la ong ba kane ka jingkhaïi be-aiñ ka dang ïaid beit khlem sangeh khamtam ka jingkhaïi ïa ka shini bad u piat sha Bangladesh.
Namarkata, u Marak u la kynnoh ba dei na ka jingbym shimkhia jong ki bor distrik ka North Garo Hills, South Garo Hills bad West Garo Hills ba ka jingkieng Bakgla kaba don ha Joshipara ha South Garo Hills ka la khyllem noh ha ka 16 tarik Ïaïong. U la ong ba ka jingkhyllem jong kane ka jingkieng ka dei namar ki artylli ki trok kit shini kiba la kit palat pud.
U la ong ba ha ka jingshisha, na katei ka jingkieng la shah ban ïaid ïa ki trok kiba kit tang 9 Metric Ton, hynrei kitei ki trok kiba la hap lang bad ka jingkieng hynnin ka sngi ki la kit palat 20 metric ton. Kitei ki trok ki don kiba don ïa u nombor AS-01-MC-4307 bad AS-01-FC-6875 bad u trai u dei uba la tip kyrteng kum u Akrirul Islam Faraji.
Shuh shuh u la ong ba ka jingkhyllem jong katei ka jingkieng Bakgla ka la ktah ïa ka leit ka wan jong ki nongshong shnong kiba sah ha South Garo Hills khamtam ba ka dei ka jingkieng kaba pynïasoh ïa ka South bad ka West Garo Hills. Nalorkata, u la ong ba ka jingkhyllem jong ka jingkieng kan ktah ïa ka leit ka wan jong ki nongpyniaid ia ka jingthep vote ha ka 19 tarik Ïaïong 2024.
Namarkata, u Marak u la kyntu ïa u Chief Electoral Officer ba un shimkhia halor katei ka mat ba u la wanrah bad ban leh da kaba tyngeh pyrshah ïa ki bor distrik bad SP ka North Garo Hills, South Garo Hills, West Garo Hills bad ki ophisar ka tnat Customs ha Gasuapara South Garo Hills namar ka jingpynkheiñ ïa ki kyndon jong ka Model code of conduct bad ka jingailad ïa ka jingkhaïi be-aiñ sha Bangladesh ha ka por ba dang ïaid ka ilekshon MP Lok Sabha.
