Shillong, Ïaïong 17
Sa tang shi sngi bad katto-katne kynta, ka Jylla kan sa ïoh ïa ka ilekshon sha ka Lok Sabha. Ha kane ka kynti ki bor pynïaid ilekshon hapoh ka jingïalam u Chief Electoral Officer (CEO) ka Jylla ym tang ba kin pyntikna ïa ka ilekshon kaba ïaid beit ïaid ryntih, hynrei ban khot bad wer ïa baroh ki nongïalam ha ki shnong ki thaw ban ïatreilang khnang ban ïoh ïa ka ilekshon kaba khuid ba suba ne ka ‘Clean and Green Election’.
Haba ïadei bad kane, dei ka shnong kaba khuid tam ha dewbah Asia – ka Mawlynnong, kaba lamkhmat ha kaba ki samla kynthei bad shynrang ki la ïa wan lang ban pynkhuid ïa ka jaka thep ‘vote’ kaba don ha kawei ka skul shnong kaba la pynïaid da ka Church of North India.
Halor kane ka sienjam, u Rangbah Shnong ka Mawlynnong, Bah Thomlin Khongthohrem u la ong, “Ka long kaba kmen ban ïohsngew ba u CEO bad ka tnad ilekshon ki la lamkhmat ban kitkhia haba ïadei bad ka khuid ka suba jong ki jaka thep ‘vote’, namar kane ka pyni ïa ka jinglong hok bad ka jingbym shah liang jong ka rukom treikam ka ilekshon kaba lait na ka bor pisa bad jingpynbor.”
U Rangbah Shnong jong kawei na ki shnong kaba khuid tam ha Shillong, Nongrim Hills, Bah Bantyllilang Narry u la ong, “Ngi dei ban pdiang sngewbha ïa kane ka sienjam naba kan pyntikna ba hadien ka sngi ilekshon, yn ym ïohi ïa ka jingjaboh bad jingpyndonkam plastik ha ki sawdong sawkun jong ka jaka thep ‘vote’. Kane ka dei ban rah ïa ka khubor sha la ki ïing ki sem ba ka jingïada ïa ka mariang ka long kaba hakhmat eh ha ryngkat ka jingïashim bynta jong ki nongshong shnong ban thep ‘vote’.”
Na ka liang u CEO u la pyllait ruh ïa ka kot lyngkdop haba ïadei bad ka jingbam smai ha kaba baroh ki nongtrei kiba don bynta ha kane ka ilekshon ba kynthup ïa ka imlang-sahlang kin ïatreilang ha ka ban pynlong ïa ka jingpynkhuid ha ki sawdong jong ka jaka thep ‘vote’.
U Chief Electoral Officer ka Jylla, Dr. B.D.R. Tiwari, IAS u la ong, “Ka jingthmu ka long ban kynthup lang ïa ki kynhun ba don bynta ha ka ilekshon bad ki nongïalam ha ka imlang-sahlang ban ïa wan lang kumjuh ban pyni ïa ka jingkitkhlieh ïa ka mariang, namar ka jingim jong ngi ka shong ha ka. Ha kawei ka liang, lada ngi thep ïa ka ‘vote’ jong ngi na bynta ka lawei, ka mariang ka don ïa ka bynta ba kongsan ban pynneh-pynsah ïa ka jingmanbha jong ngi kum ki nongshong shnong jong kane ka ri.”
Shuh shuh u Dr. Tiwari u khot u wer ïa man la ki nongshong shnong kynthup ïa ki seng saiñ pyrthei ban ïashim bynta ha kane ka ilekshon sha ka Lok Sabha ha ryngkat ka jingsngewkhia kaba dei ban pyni sha ka mariang bad kyrpad ïa ka jingsynñiang jong ki kynthei bad samla da kaba ïashim bynta ha kine ki jingpynkhuid.
Haba pynsngew ba ka ilekshon sha ka Lok Sabha ka long kaba donkam kumba long lem kiwei-kiwei ki ilekshon hapoh ka Jylla, u CEO u la ong, “Ka long kaba donkam ïa ngi ban sngewthuh ïa kane, namar haba ka jingdon ki nongwan thep ‘vote’ ka bun, ngin pyndep ïa ki hok bad kamram jong ngi kum ki nongshong shnong ba shisha jong kane ka ri bad ka Jylla.”
