Shillong, Ïaïong 17
Kum shi bynta ban ailad ïa ki khynnah skul ban sei madan ïa la ki sap ba kyrpang ha ki kam ïalehkai, ka shlem treikam u District Sport Officer (DSO) Ri Bhoi District kan pynlong ïa ka Annual Sports Meet ha Ri Bhoi na ka bynta ban ailad ïa ki skul bapher bapher ba kin ïashim bynta ha kane ka lympung ïalehkai.
Katkum ka kyrwoh ba la pyllait da u DSO Ri Bhoi, u Bah Bobby Nongbet u la pyntip ba kane ka District Level Inter School Athletic Meet 2024 kan long lai sngi kynthih naduh ka 1 tarik haduh 3 tarik u Jymmang 2024 ha NSCA Mini Stadium Pahamsyiem, Nongpoh.
Na ka liang katei ka shlem treikam ka khot bad wer ïa baroh ki skul ha Ri Bhoi ban shim bynta ha kane ka lympung bad kino-kino ki skul kiba thmu ban shim bynta ki dei ai kyrteng sha ka shlem treikam u DSO bad ka tarik ban pynpoi ïa ki jingpynrung kyrteng ïa ki skul ba shim bynta kan long ha ka 22 tarik mynta u bnai.
