Shillong, Ïaïong 18
Ka Meghalaya Human Rights Commission (MHRC) ka la ai por shi bnai ïa u Director General of Police (DGP) ka Meghalaya ban ai ka jubab kaba pura halor ka jinglap ïa ki 3 tylli ki metïap kiba la shah thang ha ka Sngi Balang.
Ha ka kyrwoh khubor ba la pyllait ha ka Sngi Palei, u Secretary ka Commission, u la bthah ïa u DGP ka Jylla ba un phah ïa ka kaiphod shim kam ne ka Action Taken Report (ATR) hapoh shi bnai naduh ba la ïoh pdiang ïa ka hukum.
Ka MHRC ka la pyntip ba ka la shim da ka ‘Suo Moto’ hadien ba ka la ïohi ïa ka jingmih ha ka kot khubor ha ka 17 tarik mynta u bnai, shaphang ka jingjia ba la lap ïa ka metïap jong 3 ngut ki nong Assam na East Garo Hills.
Kum ban shu pynkynmaw, lai ngut ki briew ïa kiba la suba ba ki dei ki nongtuh kali na ka jylla Assam, ki la shah thang im ha ka khlaw kaba don ha East Garo Hills District bad ki Pulit ki la ïathuh ba ka la don ka jingsuba ba ka lah ban dei ka kynhun jong ki nongtuh kali kiba la leh ïa kane ka kam bymman.
Ka khubor ka ïathuh ruh kine ki briew na Assam ha ryngkat bad u nongñiah ka kali ba ki shim wai, ki la shah pynïap bad shah thang ha Rongmil haduh ba ym lah shuh ban ithuh ïa ka durkhmat. Ka jaka ba kane ka jingjia ka jia ka jngai kumba 15 kilometer na Rongjeng, East Garo Hills.
