Nongpoh, Ïaïong 18
Shi sngi shwa ka jingjied ïa ki dkhot sha ka ïingdorbar Parliament Lok Sabha, ki pulit ka Ri Bhoi ki la pynkhlaiñ bad pynjur ïa ka jingpahara ha kylleng ki jaka jong ka District bad ruh ban talasi ïa ki kali khnang ba kan nym don kano-kano ka jingïaid lait na ki kyndon jong ka Election Commission of India (ECI) bad ruh khamtam ba ki paidbah kin ïoh lad ban leit thep ïa la ki ‘vote’ lashai ka sngi da ka jingshngaiñ bad ka jinglaitluid khlem kano-kano ka jingpynthut.
U Bah Jason Mairom, Additional Superintendent of Police (HQ) ka Ri Bhoi haba kren sha ki lad pathai khubor ha ka Sngi Palei, u la ïathuh ba ki don kumba 333 tylli ki Polling Station ha Ri-Bhoi. Na kine, 35 tylli ki dei kiba la don jingma & shah ktah (critical & vulnerable) bad ka jingpahara ruh la leh katkum ki kyndon jong ka ECI bad pyntip ruh ba la ïoh shuh sa kumba 3 pyrton ki pulit CRPF ban pyndonkam ha ka jingïaid pahara, ka jingtalasi kali bad kiwei kiwei na ka bynta ka jingïaid beit ïaid ryntih ka ilekshon MP.
U Bah Jason u la ïathuh ba naduh ka 1 tarik u Lber haduh ka 17 tarik mynta u bnai, ki pulit ki la ïoh ban kurup kumba 389 litar ka kyiad phareng (Indian Made Foreign Liquor) kaba shong dor T. 1.97 lak, 367 litar ka beer kaba shong dor T. 71,000 , 1495 litar ka kyiad shna hi (country made liquor) kaba shong dor T. 1.49 lak, 113 gram u drok Heroin uba shong dor T. 95 lak bad kumba 4746 kilo u Ganja uba shong dor kumba ` 20 klur.
Ha kaba ïadei pat bad ka jingpynkheiñ ïa ka Model Code of Conduct jong ka ECI ha Ri Bhoi, u Bah Jason u la ïathuh ba ki don kumba 3 tylli ki jingjia, kata 2 tylli kiba la jia ha ka 10 tarik mynta u bnai ha kaba katto katne ngut ki briew ki la pyrshang ban pynthut ïa ka jingïalap ilekshon jong kawei ka seng saiñ hima-sima ha Umsning bad halor kane, ki pulit ki la ‘register’ da ka Non-FIR case bad ka jingtohkit ka dang ïaid shakhmat.
Nalor nangta, u la ong sa kawei ka jingjia ka dei ka jingshah kawang maw ka ïingsah jong ka Kong Macdalyne Sawkmie Mawlong, MDC ka Umsning kaba don ha ka shnong Sohkyndur. Ha kaba ïadei bad kane ruh ki pulit ki la ïohpdiang ïa ka ejahar (FIR) bad ka jingtohkit ban lap ïa ki briew ba donkti ka dang ïaid shakhmat.
Shuh shuh u la ïathuh ba hynnin ka sngi, kumba 89 tylli ki kynhun jong ki nongtrei sorkar ki la mih ban leit sha ki Polling Station bapher-bapher kiba kham jngai bad ha ka Sngi Palei sa kumba 244 tylli ki kynhun ki la mih ban leit sha la ki Polling Station. Kumta na ka liang ki pulit ki la pynjur ïa ka jingpahara ha ki Polling Station kiba don jingma bad ruh kito kiba don ha ki thaiñ khappud khnang ba ka jingjied ïa ki nongmihkhmat sha Parliament kan long kaba ïaid beit ïaid ryntih.
