New Delhi, ïaïong:
U Myntri ka tnat ki kam pohïing u Amit Shah ha ka sngi Balang u la ai ka jingïaroh sha ki shipai ïada ri halor ka jinglah jong ki ban ïakhun pyrshah ïa ki lehnoh ha Kanker kaba don ha Chhattisgarh ha kaba ki la don kumba 29 ngut ki lehnoh Maoist kiba la shah siat ïap ha ka por ba don ka jingïasiat kaba mar kylliang.
U Amit Shah u la ong ba ki shipai ïada ri ki la ïoh ïa ka jingjop kaba khraw ha ka jylla.
“Naduh ba u Modi u la long u Myntri Rangbahduh jong ka ri, ka sorkar BJP ka la pynlong ïa kiba bun ki jingpynbna paidbah kiba khlem sangeh bad kiba ïai bteng pyrshah ïa ki kam pyntriem jong ki lehnoh…Ngi la sdang ban buh ïa ki jaka treikam ki shipai ïada ri naduh u 2014,” la ong u Amit Shah.
U Myntri ka tnat ki kam pohïing u la bynrap shuh shuh da kaba ong ba ki la don kumba 250 tylli ki jaka treikam jong ki shipai ba la buh ha Chhattisgarh halor ka jingthmu ban lah ban tehlakam ïa ki Maoist.
“Hadien u snem 2019, ki la don kumba 250 tylli ki jaka treikam jong ki shipai ba la buh…Hadien ka jingthaw sorkar, ha ki lai bnai, ki la don palat 80 ngut ki lehnoh Naxal kiba la shah pynïap ha Chhattisgarh, palat 125 ngut ki la shahkem bad palat 150 ngut ki la leit ban pyndem…” u la bynrap.
Ha kaba ïadei bad kane, haba phai sha ka rynsan phah khubor ha ka X, u Amit Shah u la ai ka jingïaroh sha ki shipai ïada ri kiba la don bynta ha ka kynhun ban leit thwet lehnoh, “Mynta, ki la don bun ngut ki lehnoh Naxal kiba la shah pynïap ha ka por ba don ki jing-leit thwet lehnoh ki shpai ïada ri ha Chhattisgarh. Nga ai ka jingkhublei bad jingïaroh sha baroh ki shipai ïada ri kiba la lah ban pynlong ïa kane ka jingleit thwet lehnoh kaba jop da ka jingshlur mynsiem jong ki bad kwah ba ki pulit kiba la mynsaw kin ïoh noh kloi ïa ka jingkoit…”
U Shah u la ong ba ki lehnoh Maoist ki la leh donbor ha kawei ka thaiñ kaba rit kaba don ha Chhattisgarh namar ka jingpyrshah halor ki jingpyntreikam jong ka sorkar. Ym slem shuh ba ka Chhattisgarh bad baroh kawei ka ri kin sa lait noh na ki lehnoh Naxal, la ong u Shah.
