Shillong, Ïaïong 18
Ka Ïingshari jong ka Italy ha ka Sngi Balang ka la bthah ïa ka Juventus ba ka dei ban siew ïa ka bai lutksan sha u khlur ïalehkai ka Portugal u Cristiano Ronaldo haduh 9.7 million euros ($10.4 million) hadien ba kam shym la lah ban siew dep ha ka aïom ïalehkai 2020-21.
U Ronaldo u la buh ka jingkyrpad hakhmat ka Court of Arbitration, ba ka Juventus ka dei ban siew ïa u haduh 9,774,166.66 euros, ryngkat ka sut halor ka jingbym lah ban siew dep.
Kane ka jingsiew ka kynthup ïa ka tulop jong ka Ronaldo kaba u dei ban ïohpdiang hadien ba la khate ïa ka khajna bad kiwei.
Ha kaba nyngkong u Ronaldo u la dei ban ïoh 19.5 million euros, hynrei ka Ïingshari ka la pynduna haduh 50 na ka shispah. U Ronaldo, uba la ïalehkai na ka Juventus naduh u 2018 haduh u 2021 ha shwa ba un leit ïasoh sha ka Manchester United bad ka Al Nassr, um shym la ïoh ïa ka jingsiew dep na katei ka klob kaba na Italy.
Na ka liang ki bor ba dei khmih ka Juventus kim shym la lah ban ong eiei, hynrei ki la pyntip ba kin sa ai jingpynshai halor kane ka bynta.
Kat kum ka jingpyllait da ka Forbes, utei u khlur ïalehkai uba la ïohpdiang haduh san sien ïa ka khusnam Ballon d’Or u la long u rangïalehkai uba la ïoh ia ka jingsiew kaba heh duh ha ka pyrthei ha u 2023, ha kaba u la kamai kumba $136 million, bad $46 million.
Hynrei na ka liang ka Juventus, ka la pynpaw ïa ka jingduhnong haduh 123.7 million euros ha ka snem mang tyngka 2022-23, kaba la pynkut ha u Jylliew, kat kum ka jingpynbna hau Risaw.
