Shillong, Ïaïong 18
U Chief Electoral Officer (CEO) ka jylla, u Dr. B.D.R. Tiwari, IAS, haba pynbna paidbah lyngba ka rynsan ‘X’, u la pyni ïa ki dur katba ki briew jong ka sorkar kiba kynthup naduh ki Polling Officer bad kiwei kiwei ki dang jam sha shiliang ka Wah Myntdu ban poi sha Kamsing Polling Station na ka bynta ban pynlong ïa ka jingthep ‘vote’ ha ka Sngi Thohdieng.
Ha katei ka jingthoh, la ong ruh ba hapoh ka Kamsing Polling Station kaba don ha West Jaiñtia Hills bad kaba hap hapoh ka Amlarem Constituency, ki don tang 36 ngut ki briew kiba la ïoh ïa ka hok ban thep ‘vote’.
Na ka liang ki nongshong shnong ki la ïarap ïa kitei ki nongpynïaid ilekshon ban poi sha ka jaka thep ‘vote’ ban pynkhreh ïa ki jingdonkam na ka bynta lashai ka sngi.
Ki nongshong shnong ki la pynlong ruh ïa ka jingpynkhuid ïa ka jaka thep ‘vote’ ha Kamsing.
