Shillong, Ïaïong 18
Ka jingkhluit ka ilekshon MP mynta ka sien ka lah ban kham kiew haba ïadei bad ka jingwan ki nongthep ‘vote’ lada ïanujor bad ka ilekshon MP kaba la long ha u snem 2019.
Ha u snem 2019, ka jingwan ki nongthep ‘vote’ ka long 65.48% ha Shillong Parliamentary konstitwensi bad 81.38% ha Tura Parliamentary konstitwensi.
Ka jingïalap ilekshon ha kane ka kynti ka long kaba khluit bha ha kaba la jur ka jingkynthoh markylliang khamtam hapdeng ka NPP bad ka VPP kaba la poi ruh shaduh u pud ban leit pynwit ïa ki jingïalang ïalap ilekshon jong kiwei ki seng, bad jia ruh ka jingshah kawang maw ka ïing jong ka MDC ka Umsning konstitwensi.
Ki nongthep ‘vote’ kiba dei ban thep ‘vote’ ha ka sien banyngkong ha kane ka ilekshon Lok Sabha ki don 31,247 ngut.
Ki nongthep ‘vote’ hapdeng ka rta 18 bad 19 snem ki don 84,412 ngut bad kiba hapdeng 20 bad 29 snem ka rta ki don 7,17,416 ngut, katba ki nongthep ‘vote’ kiba la kynjoh palat 100 snem ka rta ki don 341 ngut bad kiba la palat 85 snem ka rta ki don 10,180 ngut ha kane ka ilekshon MP.
Ki nongthep ‘vote’ kiba don jingduna dkhot met ki don 11,720 ngut.
Ki jaka thep ‘vote’ ban pynïaid hi da ki kynthei ki don 88 tylli bad ki jaka thep ‘vote’ ban pynïaid da kiba duna dkhot met ki don 10 tylli.
