Shillong, Ïaïong 18
Uwei u nonghikai skul ba la 55 snem ka rta ïa uba la tip kyrteng kum u Sanjay Sharma na ka shnong Hawang, West Karbi Anglong District jong ka jylla Assam, u la jah ha nongbah Shillong naduh ka 15 tarik Ïaïong.
Katkum ki jingtip ba la ïohlum, la ong ba utei u rangbah u la mih na la shnong bad u la poi ha nongbah Shillong ha ka por 9:30 mynstep bad hadien jong kata ki bahaïing hasem ki khlem ïoh shuh ban ïakren bad u. La ong ruh ba u Sharma u la thmu ban leit ïew ha Ïewduh hynrei u la jah noh na Garikhana.
Katkum ka ejahar ba la soi na ka liang ki bahaïing hasem, la ong ba u Sharma u don ïa ka rynïeng kaba 5.4 phut ba kham dum ka snieh doh bad ba don ka dak ot na ka bynta kadiang jong ka dur bad u la phong ïa ka patlun rong ïong bad ka ‘sweater’ ba thoh-bruiñ (stripe) bad u la rah ruh bad ka pla jong ka SPM IAS Academy Guwahati.
Ha kaba ïadei bad kane ka jingjia, ki bahaïing hasem ki la ujor da ka ejahar ha thanat Lumdiengjri bad ki la kyntu ruh ïa ki paidbah ba ïohi ïa u Sanjay Sharma ba kin sngewbha ban phone ha u nombor 9089190825 lane 9101394977 lane ki lah ban pyntip sha ki thanat kiba hajan.
